குறுவினா

குறுவினா

1.'வேங்கை' என்பதைத் தொடர்மொழியாகவும் பொதுமொழியாகவும் வேறுபடுத்திக் காட்டுக.

தனிமொழி

தொடர்மொழி

பொதுமொழி

வேங்கை-ஒருவகை மரம்

வேங்கை=வேகின்ற கை

'வேங்கை' என்னும் சொல் தனிமொழியாக நின்று மரத்தையும், தொடர்மொழியாக நின்று வேகின்ற கையையும் குறிப்பதால் இது 'பொதுமொழி' ஆகிறது

2."மன்னும் சிலம்பே! மணிமே கலைவடிவே! முன்னும் நினைவால் முடிந்தாழ வாழ்த்துவமே!" -இவ்வடிகளில் இடம்பெற்றுள்ள காப்பியங்களைத் தவிர எஞ்சியுள்ள ஐம்பெருங் காப்பியங்களின் பெயர்களை எழுதுக.

எஞ்சியுள்ள ஐம்பெருங்காப்பியங்கள்

சீவக சிந்தாமணி 

வளையாபதி

குண்டலகேசி

3.ஒரு தாற்றில் பல சீப்பு வாழைப்பழங்கள் உள்ளன. 

ஒரு சீப்பில் பல தாறு வாழைப்பழங்கள் உள்ளன. 

ஒரு சீப்பில் பல வாழைப்பழங்கள் உள்ளன. 

மேற்கண்ட தொடர்களில் சரியான தொடர்களைச் சுட்டிக்காட்டி, எஞ்சிய பிழையான தொடரிலுள்ள பிழைக்கான காரணத்தை எழுதுக.

சரியான தொடர்கள்: 

ஒரு தாற்றில் பல சீப்பு வாழைப்பழங்கள் உள்ளன. 

ஒரு சீப்பில் பல வாழைப்பழங்கள் உள்ளன. 

       பிழையான தொடர்:

       தாற்றில்தான் சீப்புகள் இருக்கும். எனவே, "ஒரு சீப்பில் பல தாறு   

       வாழைப்பழங்கள் உள்ளன" என்னும் தொடர் தவறானதாகும்.

4."உடுப்பதூஉம் உண்பதூஉம் காணின் பிறர்மேல் வடுக்காண் வற்றாகும் கீழ்- இக்குறளில் அமைந்துள்ள அளபெடையின் வகையைச் சுட்டி, அதன் இலக்கணம் தருக.

இன்னிசை அளபெடை:

உடுப்பதூஉம்

உண்பதூஉம்

இலக்கணம்: 

செய்யுளில் ஓசை குறையாதபோதும், இனிய ஓசைக்காக உயிர்நெடில் எழுத்துக்கள் ஏழும் அளபெடுப்பது இன்னிசை அளபெடையாகும்.

5.தற்கால உரைநடையில் சிலேடை அமையும் நயத்திற்கு ஓர் எடுத்துக்காட்டுத் தருக.

சிலேடை நயம்:தமிழறிஞர் கி.ஆ.பெ.விசுவநாதன் பல் மருத்துவத்தில் சிறப்புப்பட்டம் பெற்ற நண்பர் ஒருவரை அறிமுகம் செய்து வைத்தபோது "இவர் பல்துறை வித்தகர்" என்று குறிப்பிட்டார்!

6.'நமக்கு உயிர் காற்று 

காற்றுக்கு வரம் மரம்- மரங்களை 

வெட்டி எறியாமல் நட்டு வளர்ப்போம்'- இதுபோன்று உலகக் காற்று நாள் விழிப்புணர்வுக்கான இரண்டு முழக்கத் தொடர்களை எழுதுக.

உலகக் காற்று நாள் முழக்கத்தொடர்:

கடவுளின்றி உலகமில்லை... 

காற்றின்றி உயிர்களில்லை!

மரம் வளர்ப்போம்... 

மாசு குறைப்போம்!

7.வசன கவிதை- குறிப்பு வரைக.

வசன கவிதை:

உரைநடையும் கவிதையும் இணைந்து யாப்புக் கட்டுகளுக்கு அப்பாற்பட்டு உருவாக்கப்படும் கவிதை வடிவம் வசனகவிதை எனப்படுகிறது. 

இவ்வடிவம் தமிழில் பாரதியாரால் அறிமுகப்படுத்தப்பட்டது.

8.தண்ணீர் குடி, தயிர்க்குடம் ஆகிய தொகைநிலைத் தொடர்களை விரித்து எழுதுக; தொடரில் அமைக்க.

தண்ணீர் குடி-தண்ணீரைக் குடி

தினமும் ஐந்து லிட்டர் தண்ணீர் குடிக்க வேண்டும்.

தயிர்க்குடம்-தயிரை உடைய குடம்

தயிர்க்குடத்தை எடுத்து வா

9.பெற்றோர் வேலையிலிருந்து திரும்பத் தாமதமாகும் போது அழும் தம்பிக்கு நீங்கள் கூறும் ஆறுதல் சொற்களை எழுதுக.

அழும் தம்பிக்கு ஆறுதல் சொற்கள்:

அழாதே! செல்லம் அழாதே!

அம்மா வரும்போது, தின்பண்டம் வாங்கி வருவார்கள்.

உருட்டி விளையாடப் பொம்மை வாங்கி வருவார்கள்.

அழாதே! தங்கம் அழாதே!

10.மாஅல் -பொருளும் இலக்கண குறிப்பும் தருக.

பொருள்: மாஅல்-திருமால் 

இலக்கணக்குறிப்பு: மாஅல்-செய்யுளிசை அளபெடை.

11.விருந்தினரை மகிழ்வித்துக் கூறும் முகமன் சொற்களை எழுதுக.

முகமன் சொற்கள்:

வாருங்கள்! வாருங்கள்!

உட்காருங்கள்! சிறிது மோர் பருகுங்கள்! 

வீட்டில் எல்லோரும் நலமா? 

உங்களைக் கண்டது, நான் பெற்ற பெரும்பேறு.

12.'தானியம் ஏதும் இல்லாத நிலையில் விதைக்காக வைத்திருந்த தினையை உரலில் இட்டு குற்றியெடுத்து விருந்தினருக்கு விருந்தளித்தாள் தலைவி என்பது இலக்கியச் செய்தி. விருந்தோம்பலுக்குச் செல்வம் மட்டுமே இன்றியமையாத ஒன்றா? உங்கள் கருத்தைக் குறிப்பிடுக.

விருந்தோம்பல்:

விருந்தோம்பலுக்குச் செல்வம் மட்டுமே இன்றிமையாததில்லை.

"அகனமர்ந்து ஈதலின் நன்றே, முகனமர்ந்து

இன்சொலன் ஆகப் பெறின்" என்கிறார் வள்ளுவர். 

விருந்தோம்பலுக்குச் செல்வத்தைவிட, அன்பும் இனிய சொற்களுமே இன்றியமையாதவை.

13.'எழுது என்றாள்' என்பது விரைவு காரணமாக 'எழுது எழுது என்றாள்' என அடுக்குத்தொடரானது. 'சிரித்துப் பேசினார்' என்பது எவ்வாறு அடுக்குத்தொடராகும்?

அடுக்குத்தொடர்:

சிரித்துப் பேசினார்-சிரித்துச் சிரித்துப் பேசினார்.

14.'இறடிப்பொம்மல் பெறுகுவிர்'- இத்தொடர் உணர்த்தும் பொருளை எழுதுக.

இறடிப்பொம்மல் பெறுகுவிர்:

தினைச்சோற்றை உணவாகப் பெறுவீர்கள்!

15.பாரதியார் கவிஞர், நூலகம் சென்றார், அவர் யார்? ஆகிய தொடர்களில் எழுவாயுடன் தொடரும் பயனிலைகள் யாவை?

பாரதியார் கவிஞர்-பெயர்ப் பயனிலை

நூலகம் சென்றார்-வினைப் பயனிலை

அவர் யார்?-வினாப் பயனிலை

16.'நச்சப் படாதவன்' செல்வம்- இத்தொடரில் வண்ணமிட்ட சொல்லுக்குப் பொருள் தருக.

நச்சப்படாதவன் செல்வம்:

பிறருக்கு உதவி செய்யாததால் ஒருவராலும் விருப்பப்படாதவர்

17.கொடுப்பதூஉம் துய்ப்பதூஉம் இல்லார்க்கு அடக்கிய 

கோடி உண்டாயினும் இல் -இக்குறளில் வரும் அளபெடைகளை எடுத்து எழுதுக.

இன்னிசை அளபெடை:

கொடுப்பதூஉம் 

துய்ப்பதூஉம் 

18.பொருளுக்கேற்ற அடியைப் பொருத்துக.

உயிரைவிடச் சிறப்பாகப் பேணிக் காக்கப்படும்-ஒழுக்கத்தின் எய்துவர் மேன்மை 

ஊரின் நடுவில் நச்சுமரம் பழுத்தது போன்றது-உயிரினும் ஓம்பப் படும்

ஒழுக்கத்தின் வழி உயர்வு அடைவர்-நடு ஊருள் நச்சு மரம் பழுத்தற்று

பொருத்தம்:

உயிரைவிடச் சிறப்பாகப் பேணிக் காக்கப்படும்-உயிரினும் ஓம்பப் படும் 

ஊரின் நடுவில் நச்சுமரம் பழுத்தது போன்றது-நடு ஊருள் நச்சு மரம் பழுத்தற்று

ஒழுக்கத்தின் வழி உயர்வு அடைவர்-ஒழுக்கத்தின் எய்துவர் மேன்மை  

19.எய்துவர் எய்தாப் பழி-இக்குறளுக்கு பொருந்தும் வாய்ப்பாடு எது?

அ) கூவிளம் தேமா மலர்

ஆ) கூவிளம் புளிமா நாள் 

இ) தேமா புளிமா காசு 

ஈ) புளிமா தேமா பிறப்பு

விடை:அ) கூவிளம் தேமா மலர்

20.வருங்காலத்தில் தேவையெனக் கருதுகின்ற செயற்கை நுண்ணறிவு பொதிந்த இரண்டு அறிவியல் கண்டுபிடிப்புகளைக் குறிப்பிடுக.

எ.கா. செயற்கை நுண்ணறிவால் இயங்கும் போக்குவரத்து ஊர்திகள்

செயற்கை நுண்ணறிவு பொதிந்த அறிவியல் கண்டுபிடிப்புகள்:

வங்கிச் சேவைகளை வழங்கும் செயற்கை நுண்ணறிவுள்ள ரோபோக்கள்

வயதானவர்களுக்கு உதவிகள் செய்யும் மெய்நிகர் உதவியாளர்

21.வருகின்ற கோடை விடுமுறையில் காற்றாலை மின் உற்பத்தியை நேரில் காண்பதற்கு ஆரல்வாய்மொழிக்குச் செல்கிறேன்.- இத்தொடர் கால வழுவமைதிக்கு எடுத்துக்காட்டாக அமைவது எவ்வாறு?

கால வழுவமைதி:

'வருகின்ற கோடை விடுமுறையில் காற்றாலை மின் உற்பத்தியை நேரில் காண்பதற்கு ஆரல்வாய்மொழிக்குச் செல்கிறேன்' என்பது திட்டமிடப்பட்ட உறுதியான நிகழ்ச்சி ஆகும்.

எனவே, இத்தொடர் காலவழுமைதிக்கு எடுத்துக்காட்டு ஆகும்.

22.மருத்துவத்தில் மருந்துடன் அன்பும் நம்பிக்கையும் ஆற்றும் பாங்கினை எழுதுக.

மருத்துவத்தில் அன்பும் நம்பிக்கையும்:

மருத்துவர் உடலில் ஏற்பட்ட புண்ணைக் கத்தியால் அறுத்துச் சுட்டாலும் அது நன்மைக்கே என்று உணர்ந்து நோயாளி அவரை நேசிப்பார்.

மருத்துவர் நோயாளியிடம் காட்டும் அன்பும், நோயாளி மருத்துவரிடம் வைத்திருக்கும் நம்பிக்கையும் நோயாளியை விரைவில் குணமடையச் செய்யும்.

23.உயிர்கள் உருவாகி வளர ஏற்ற சூழல் பூமியில் எவை எவையெனப் பரிபாடல் வழி அறிந்தவற்றைக் குறிப்பிடுக.

பூமியில் உயிர்கள் உருவான சூழல்:

பூமி குளிரும்படியாகத் தொடர்ந்து மழை பொழிந்தது. 

தொடர்ந்து பெய்த மழையால் பூமி வெள்ளத்தில் மூழ்கியது 

மீண்டும் மீண்டும் நிறை வெள்ளத்தால் நிறைந்த இப்பெரிய உலகத்தில் உயிர்கள் உருவாகி வாழ்வதற்கு ஏற்ற சூழல் தோன்றியது.

24."சீசர் எப்போதும் என் சொல்பேச்சைக் கேட்பான். புதியவர்களைப் பார்த்துக் கத்துவானே தவிர கடிக்க மாட்டான்" என்று இளமாறன் தன்னுடைய வளர்ப்பு நாயைப் பற்றிப் பெருமையாகக் கூறினார்.- இதில் உள்ள திணை வழுவமைதிகளைத் திருத்தி எழுதுக.

திணைவழுக்கள்-திருத்தம்

"சீசர் எப்போதும் என் சொல்பேச்சைக் கேட்கும். புதியவர்களைப் பார்த்துக் குரைக்குமே தவிர கடிக்காது" என்று இளமாறன் தன்னுடைய வளர்ப்பு நாயைப் பற்றிப் பெருமையாகக் கூறினார்.

25."கழிந்த பெரும் கேள்வியினான் எனக் கேட்டு முழுது உணர்ந்த கபிலன் தன் பால் பொழிந்த பெரும் காதல் மிக கேண்மையினான் இடைக்காட்டுப் புலவன் தென்சொல்" 

-இவ்வடிகளில் கழிந்த பெரும் கேள்வியினான் யார்? காதல் மிகு கேண்மையினான் யார்?

கழிந்த பெரும் கேள்வியினான் -மன்னன் குலேச பாண்டியன்

காதல் மிகு கேண்மையினான்-புலவர் இடைக்காடனார் 

26.செய்குதம்பிப் பாவலரின் கல்வி பற்றிய கருத்தினை முழக்கத் தொடர்களாக்குக.

கல்வி -முழக்கத் தொடர்கள்:

அருளைப் பெருக்கு! 

அறிவைத் திருத்து! 

மருளை அகற்று!

கல்வியைப் போற்று!

27.அமர்ந்தான்-பகுபத உறுப்பிலக்கணம் தருக.

பகுபத உறுப்பிலக்கணம்: 

அமர்ந்தான்=அமர்+த்(ந்)+த்+ஆன்

அமர்-பகுதி 

த்-சந்தி 

ந்-ஆனது விகாரம் 

த்-இறந்தகால இடைநிலை 

ஆன்-ஆண்பால் வினைமுற்று விகுதி 

28.இந்த அறை இருட்டாக இருக்கிறது. மின்விளக்கின் சொடுக்கி எந்தப் பக்கம் இருக்கிறது? 

இதோ... இருக்கிறதே! சொடுக்கியைப் போட்டாலும் வெளிச்சம் வரவில்லையே! மின்சாரம் இருக்கிறதா, இல்லையா? 

மேற்கண்ட உரையாடலில் உள்ள வினாக்களின் வகைகளை எடுத்தெழுதுக.

வினா வகைகள்

மின்விளக்கின் சொடுக்கி எந்தப் பக்கம் இருக்கிறது? -அறியா வினா

மின்சாரம் இருக்கிறதா, இல்லையா? -ஐய வினா

29.காட்டில் விளைந்த வரகில் சமைத்த உணவு மழைக்கால மாலையில் சூடாக உண்ணச் சுவை மிகுந்திருக்கும். இத்தொடரில் அமைந்துள்ள முதற்பொருள், கருப்பொருள்களை வகைப்படுத்தி எழுதுக.

முதற்பொருள்:

நிலம்: காடு (முல்லை)

பொழுது:

சிறுபொழுது : மாலை

பெரும்பொழுது: மழைக்காலம் (கார்காலம்)

       ii) கருப்பொருள்: வரகு

30."கலைஞர், பழுமரக்கனி பயன் கொள்ளும் பேச்சாளர். படித்தவரைக் கவரும் ஆற்றல் கொண்ட எழுத்தாளர்- பேராசிரியர் அன்பழகனார். இக்கூற்றை அயற்கூற்றாக எழுதுக.

அயற்கூற்று:

கலைஞர் பழுமரக்கனி பயன்கொள்ளும் பேச்சாளராகவும் படித்தவரைக் கவரும் ஆற்றல் கொண்ட எழுத்தாளராகவும் திகழ்ந்ததாகப் பேராசிரியர் அன்பழகனார் குறிப்பிடுகிறார்.

31.உறங்குகின்ற கும்பகன்ன 'எழுந்திராய் எழுந்திராய்' 

காலதூதர் கையிலே 'உறங்குவாய் உறங்குவாய்' 

கும்பகன்னனை என்ன சொல்லி எழுப்புகிறார்கள்? எங்கு அவனை உறங்கச் சொல்கிறார்கள்?

எழுந்திராய் எழுந்திராய்- உறங்குவாய் உறங்குவாய்:

"உறங்குகின்ற கும்பகருணனே! உம்முடைய பொய்யான வாழ்வு எல்லாம் இன்றிலிருந்து இறங்குவதற்குத் தொடங்கிவிட்டது. அதனைக் காண்பதற்காக எழுந்திடுவாய்! எழுந்திடுவாய்!" என்று சொல்லி எழுப்புகிறார்கள். 

காற்றாடி போல எல்லா இடங்களிலும் திரிகின்ற வில்லைப் பிடித்த காலனுக்குத் தூதரானவர் கையில் படுத்து உறங்கச் செல்கிறார்கள். 

32.சாந்தமானதொரு பிரபஞ்சத்தைச் 

சுமக்கின் ஒல்லித் தண்டுகள் -இக்கவிதை அடிகள் உணர்த்தும் உள்ளழகை எழுதுக.

ஒல்லித்தண்டுகள்:

ஒல்லித்தண்டுகளே பெரிய மலர்களைத் தாங்குகின்றன.

அதுபோல, மென்மையான பெண்மையே மிகப்பெரிய இப்பிரபஞ்சத்தைச் சுமக்கிறது.

33.கீழ்வரும் தொடர்களில் பொருந்தாத கருப்பொருளைத் திருத்தி எழுதுக.

உழவர்கள் மலையில் உழுதனர்.

முல்லைப் பூச்செடியைப் பார்த்தவாறே பரதவர் கடலுக்குச் சென்றனர்.

பொருத்தமான கருப்பொருள்கள்:

உழவர்கள் வயலில் உழுதனர்.

நெய்தல் பூச்செடியைப் பார்த்தவாறே பரதவர் கடலுக்குச் சென்றனர்.

34.கரப்பிடும்பை இல்லார் -இத்தொடரின் பொருள் கூறுக.

கரப்பிடும்பை இல்லார்:

தம்மிடமுள்ள பொருளை மறைத்து வைத்தல் என்னும் துன்பம் தராத நல்லார்

35.தஞ்சம் எளியர் பகைக்கு -இவ்வடிக்குரிய அசைகளையும் வாய்ப்பாடுகளையும் எழுதுக.

சீர்

அசை

வாய்ப்பாடு

தஞ்/சம்

நேர் நேர்

தேமா

எளி/யர்

நிரை நேர்

புளிமா

பகைக்/கு

(நிரை நேர்) நிரைபு

பிறப்பு

36.வறுமையின் காரணமாக உதவி கேட்டு வருபவரின் தன்மானத்தை எள்ளிநகையாடுவது குறித்துக் குறளின் கருத்து என்ன?

இரவு:

இகழ்ந்து ஏளனம் செய்யாமல் பொருள் கொடுப்பவரைக் கண்டால், இரப்பவரின் உள்ளத்தின் உள்ளே மகிழ்ச்சி பொங்கும். 

37.'பின்வருவனவற்றுள் கூரான ஆயுதம் எது என்று செந்நாப்போதார் கூறுகிறார்? ஏன் என்பதை எழுதுக?

பெரிய கத்தி, இரும்பு ஈட்டி, உழைத்ததால் கிடைத்த ஊதியம், வில்லும் அம்பும்

கூரான ஆயுதம்:

உழைத்ததால் கிடைத்த ஊதியம் 

காரணம்:

ஒருவர் பொருளை ஈட்ட வேண்டும்; அவருடைய பகைவரை வெல்லும் கூர்மையான ஆயுதம் அதைவிட வேறு இல்லை. 

38.பாசவர், வாசவர், பல்நிண விலைஞர், உமணர் -சிலப்பதிகாரம் காட்டும் இவ்வணிகர்கள் யாவர்?

சிலப்பதிகாரம் காட்டும் வணிகர்கள்:

பாசவர்-வெற்றிலை விற்போர்

வாசவர் -ஏலம் முதலான ஐந்து நறுமணப் பொருள் விற்போர்

பல்நிண விலைஞர்-பல வகையான இறைச்சிகள் விற்போர்

உமணர் -உப்பு விற்போர்

39.மெய்க்கீர்த்தி பாடப்படுவதன் நோக்கம் யாது?

மெய்க்கீர்த்தி பாடப்படுவதன் நோக்கம்:

அரசர்கள் தங்கள் வரலாறும் பெருமையும் காலம் கடந்தும் நிலைக்க விரும்பினார்கள்; 

அழியாத வகையில் அதனைக் கல்லில் செதுக்கினார்கள்.

40.வறுமையிலும் படிப்பின் மீது நாட்டம் கொண்டவர் ம.பொ.சி என்பதற்குச் சான்று தருக.

படிப்பின் மீது நாட்டம் கொண்டவர் ம.பொ.சி.:

நூல் வாங்குவதற்குப் போதிய பணமில்லாத குறையால் பழைய புத்தகங்கள் விற்கும் கடைகளுக்குச் சென்று, தனக்கு விருப்பமான புத்தகங்களை மிக மிகக் குறைந்த விலைக்கு வாங்குவதை வழக்கமாகக் கொண்டிருந்தார். 

உணவுக்காக வைத்திருக்கும் பணத்தில் புத்தகங்களை வாங்கிவிட்டு, பல வேளைகளில் பட்டினி கிடந்திருக்கிறார்.

41.புறத்திணைகளில் எதிரெதிர்த் திணைகளை அட்டவணைப்படுத்துக.

எதிரெதிர்த்திணைகள்:

வெட்சி × கரந்தை 

வஞ்சி × காஞ்சி 

நொச்சி × உழிஞை

தும்பை × வாகை

பாடாண்× பொதுவியல்

கைக்கிளை ×பெருந்திணை

42.பொருத்தமான இடங்களில் நிறுத்தற்குறியீடுக.

பழங்காலத்திலே பாண்டியன் ஆண்ட பெருமையைக் கூறி சோழன் ஆண்ட சிறப்பைச் சொல்லி சேரன் ஆண்ட மாண்பினைக் காட்டி நம் அருமைத் தமிழ்நாடு ஆங்கிலேயருக்கு அடிமைப்பட்டிருந்த சிறுமையும் நினைவூட்டி விடுதலைப் போரில் ஈடுபட வருமாறு தமிழர்க்கு அழைப்பு விடுத்திருந்தேன்-ம.பொ.சி.

நிறுத்தற்குறியிடுதல்:

பழங்காலத்திலே பாண்டியன் ஆண்ட பெருமையைக் கூறி, சோழன் ஆண்ட சிறப்பைச் சொல்லி, சேரன் ஆண்ட மாண்பினைக் காட்டி, நம் அருமைத் தமிழ்நாடு ஆங்கிலேயருக்கு அடிமைப்பட்டிருந்த சிறுமையும் நினைவூட்டி விடுதலைப் போரில் ஈடுபட வருமாறு தமிழர்க்கு அழைப்பு விடுத்திருந்தேன். -ம.பொ.சி.

43.'கொள்வோர் கொள்க; குரைப்போர் குரைக்க! 

உள்வாய் வார்த்தை உடம்பு தொடாது'

அ) அடியெதுகையை எடுத்தெழுதுக.

ஆ) இலக்கணக்குறிப்பு எழுதுக-கொள்க, குரைக்க

அ) அடியெதுகை

கொள்வோர்

உள்வாய் 

ஆ) இலக்கணக்குறிப்பு

கொள்க, குரைக்க-வியங்கோள் வினைமுற்று 

குறள் வெண்பாவின் இலக்கணத்தை எழுதி எடுத்துக்காட்டுத் தருக.

குறள் வெண்பா:

வெண்பாவின் பொது இலக்கணம் அமையப்பெற்று இரண்டு அடிகளாய் வரும். 

முதலடி நான்கு சீராகவும் இரண்டாம் அடி மூன்று சீராகவும் வரும்.

       எடுத்துக்காட்டு: 

அகர முதல எழுத்தெல்லாம் ஆதி 

பகவன் முதற்றே உலகு

44.குறிப்பு வரைக- அவையம்.

அவையம்:

அறம் கூறும் மன்றங்கள் அரசனின் அறநெறி ஆட்சிக்குத் துணைபுரிந்தன.

அறம் கூறு அவையம் பற்றி 'அறம் அறக்கண்ட நெறிமான் அவையம்' என்கிறது புறநானூறு.

மதுரையில் இருந்த அவையம் துலாக்கோல் போல நடுநிலை மிக்கது என்று மதுரைக்காஞ்சி குறிப்பிடுகிறது.

45.காலக் கழுதை கட்டெறும்பானதும் கவிஞர் செய்வது யாது? 

காலக்கழுதை

காலக்கழுதை கட்டெறும்பான இன்றும் கையிலே வாளித்தண்ணீர், சாயக்குவளை, கந்தைத்துணி, கட்டைத் தூரிகை ஆகியவற்றைக் கொண்டு சாளரத்தைச் சுத்தம் செய்யும் பணியை கவிஞர் ஓய்வின்றிச் செய்கிறார்.

46.வஞ்சிப்பாவிற்கு உரிய ஓசை தூங்கல் ஓசை ஆகும். துள்ளல் ஓசை கலிப்பாவுக்கு உரியது. 

இத்தொடர்களை ஒரே தொடராக இணைத்து எழுதுக.

வஞ்சிப்பாவிற்குத் தூங்கலோசையும் கலிப்பாவிற்குத் துள்ளலோசையும் உரியன.

47.தீவக அணியின் வகைகள் யாவை?

தீவக அணியின் வகைகள்:

முதல்நிலைத் தீவகம் 

இடைநிலைத் தீவகம் 

கடைநிலைத் தீவகம்

48.நான் எழுதுவதற்கு ஒரு தூண்டுதலும் அதற்குரிய காரணமும் உண்டு.- இத்தொடரை இரு தொடர்களாக்குக.

நான் எழுதுவதற்கு ஒரு தூண்டுதல் உண்டு;

அதற்குரிய காரணம் உண்டு. 

49."காய்மணி யாகு முன்னர்க் காய்ந்தெனக் காய்ந்தேன்"- உவமை உணர்த்தும் கருத்து யாது?

காய்மணி யாகு முன்னர்க் காய்ந்தெனக் காய்ந்தேன்

இளம்பயிர் வளர்ந்து முதிர்ந்து நெல்ணிகளை காணும் முன்னே, தூய மணிபோன்ற தூவும் மழைத்துளி இல்லாமல் வாடிக் காய்ந்துவிட்டதைப்போல, கருணையனும் தன் தாயை இழந்து வாடுகின்றான். 

50.அன்பும் அறனும் உடைத்தாயின் இல்வாழ்க்கை 

பண்பும் பயனும் அது -இக்குறளில் பயின்று வந்துள்ள அணியின் இலக்கணம் யாது?

நிரல்நிறையணி:

சொல்லையும் பொருளையும்

 வரிசையாக நிறுத்தி, அவ்வரிசைப்படியே இணைத்துப் பொருள்கொள்வது நிரல்நிறை அணி எனப்படும்.

51.'வாழ்வில் தலைக்கனம்', 'தலைக்கனமே வாழ்வு' என்று நாகூர்ரூமி யாருடைய வாழ்வைக் குறித்துக் கூறுகிறார்?

வாழ்வில் தலைக்கனம்:

பணம்பதவிகளால் தலைக்கனம் பிடித்தவர்

தலைக்கனமே வாழ்வு:

அடுத்தவேளை உணவுக்காகத் தலையில் செங்கற்கள் சுமக்கும் சித்தாள்