வாகை சூடி

1. அச்சம் அகற்று 
2. ஆர்வம் கொள் 
3. இளமையை உணர். 
4. ஈட்டி போல் பாய் 
5. உலகம் சுற்று 
6. ஊரோடு இணங்கு 
7. எளிமையாய் வாழ் 
8. ஏறிச் செல் 
9. ஐயம் விலக்கு 
10. ஒன்றே உலகம் 
11. ஓது ஓது 
12. ஔவை சொல் கேள் 
13. கவலை ஒழி 
14. காது கொடு
15. கிழக்கு உனக்கே 
16. கீழ் மேலாகும் 
17. குறட்பா படி 
18. கூடி வாழ்   
19. கெட்டோர் விலக்கு 
20. கேட்டது கிடைக்கும் 
21. கையை நம்பு 
22. கொடுத்து வாழ் 
23. கோணல் வேண்டாம் 
24. சபதம் எடு 
25. சாதித்துக் காட்டு 
26. சிந்தனையை விரிவாக்கு 
27. சீற்றம் வேண்டாம் 
28. சும்மா இருக்காதே 
29. சூடு சொரணை வேண்டும் 
30. செருக்கு வேண்டாம் 
31. சேமித்துப் பழகு 
32. சைவம் நன்று 
33. சொற்படி நட 
34. சோற்றுக்கு உழை 
35. தமரைப் பெருக்கு
36. தாமதம் வேண்டாம் 
37. திடமாயிரு 
38. தீர விசாரி 
39. துணிவுகொள் 
40. தூரம் இல்லை 
41. தெரிந்து கொள் 
42. தேடிப்பார் 
43. தைரியம் வேண்டும் 
44. தொட்டது விடாதே 
45. தோகை விரி 
46. பண்பை வளர் 
47. பாட்டி சொல் கேள் 
48. பிதற்றல் வேண்டாம் 
49. பீடை மற 
50. புண்ணியம் செய் 
51. பூமி உனக்கே 
52. பெருமை கொள் 
53. பேறு பெறு 
54. பைசா சேர் 
55. பொய் சொல்லாதே 
56. போக்கிடம் தேடாதே 
57. நன்மை செய் 
58. நாட்டம் கொள் 
59. நிலம் தொழு 
60. நீர் சேமி 
61. நுட்பம் அறி 
62. நூல் உருவாக்கு 
63. நெகிழ்ச்சி வேண்டும் 
64. நேசம் காட்டு 
65. நைந்து விடாதே 
66. நொடியிலும் வாழ் 
67. நோன்பு பழகு 
68. மனசாட்சிப்படி வாழ் 
69. மானம் பெரிது 
70. மிரண்டு விடாதே 
71. மீட்சி உண்டு 
72. முயற்சி வெல்லும் 
73. மூளையைச் சுத்தமாக்கு 
74. மெல்லப் பேசு 
75. மேற்கிலும் உதி 
76. மொழி அறி 
77. மோதிப்பார் 
78. வலிமையை உணர் 
79. வாய்ப்பைத் தவறவிடாதே 
80. விடுதலை விரும்பு 
81. வீறு கொள்
82. வெற்றி உனதே 
83. வேடிக்கை வேண்டாம் 
84. வையம் வாழ்த்தும்.

வரவேற்புரை

மணியை ஈன்றதால் மாமலையும் 

முத்தை ஈன்றதால் சிப்பியும்

பவளத்தை ஈன்றதால் கடலும் 

அகிலை ஈன்றதால் காடும் 

வள்ளுவனை ஈன்றதால் தமிழ்நாடும் 

பெருமை அடைவது போல 

நகைச்சுவை மருத்துவர் ஞான சம்பந்தனை ஈன்றதால் முத்தமிழும் தமிழ்வளர்த்த மதுரையும் பெருமை கொள்கிறது.

தீராத வானத்தில் ஓடும்

முடிவில்லாத கதிர்கள் போல...

அடங்காத பெருங்கடலில் தாவும்

ஓயாத அலைகள் போல...

அழிவில்லாத மானுடத்திற்கு உள்ளொளி பாய்ச்சுகின்ற உத்தமரே, வருக!

அமிர்தம் வேண்டிப் பாற்கடல் கடைந்தவர்கள் தேவர்கள்

அடைக்கலம் வேண்டிக் கடுந்தவம் புரிந்தவர்கள் முனிவர்கள் 

அருந்தமிழோங்கச் சங்கம் சமைத்தவர்கள் பாண்டியர்கள்

அதுபோல,

அன்னைத்தமிழின் உள்ளம் மகிழ,

ஆற்றாமக்கள் சிந்தை மகிழ,

அருந்தமிழ்ச் சான்றோர் அகமகிழ,

நகைச்சுவை இலக்கியத்தின் நாயகராய்

வருகை தந்திருக்கும்,

இயற்றமிழ் வித்தகரே,

முதற்சுவை தீங்கனியே,

மூன்றாம்தமிழ் நாயகரே!

வருக! வருக!

நற்றமிழ் நாவலரே!

தமிழ் மரபுக் காவலரே!

வருக! வருக!

உவகை கவிஞரே! 

தமிழ் இலக்கியத்தின் சிற்றரசே!

வருக! வருக!

பண்டித மணியே!

கலை மாமணியே!

விருதுக்கு விருதானவரே!

பேராசிரியர்,

மேடைப்பேச்சாளர், 

நூலாசிரியர், 

நேர்முக வர்ணனையாளர், 

தன்னம்பிக்கைப் பேச்சாளர், 

திரைப்பட மற்றும் சின்னத்திரை நடிகர் 

கலைமாமணி திரு. கு. ஞானசம்பந்தன் அவர்களை

வருக! வருக! என வரவேற்பதில் 

மாமதுரைப் புத்தகத் திருவிழா பெருமை கொள்கிறது.

நான் இந்தியாவின் பிரதமராக இருந்தால்-கவிதைப் போட்டி

உலகின் தலைசிறந்த பண்பாடு - நமது 

உயர்ந்த கலாச்சாரத்தைக் கொண்டாடு 

இனம் மொழி மத வேறுபாடு - நம்மில் 

இடர்பல வரும்போது ஒன்றுபடு 

என் இதயம் துடிக்கும் இந்தியன் என்று 

எமது பாரதம் நிலைக்கும் உலகை வென்று 

இளைய பாரதம் புதிய பாரதம் என் முன்னே 

எண்பது கோடி உழைக்கும் மக்களே 

எமது பாரதத்தின் பலம் 

வலுவான அடிப்படைக் கல்வி - உடன் 

திறன்மிக்க தொழிற்கல்வி 

வேளாண்மை அதில் தொழில்நுட்ப மேலாண்மை 

விரைவுப் போக்குவரத்து அதில் விரிவான பாதுகாப்பு 

தொழில் பெருக்கம் அதில் இயற்கைப் பாதுகாப்பு 

சீர்திருத்த நிர்வாகம் அதில் ஊழல் ஒழிப்பு 

ஏற்றத்தாழ்வு அகல சமவாய்ப்பு சம பகிர்வு 

இறையாண்மைக்கு கேடு இல்லாத சுதந்திரம் 

ஒற்றுமை ஒருமைப்பாட்டிற்கு நல்லிணக்கம் 

திட்டமிட்ட பொருளாதாரம் அதில் கடன் இல்லாத வளர்ச்சி 

நாட்டின் வளர்ச்சிக்காகவே அரசியல் 

அரசியலாகாத நாட்டின் பாதுகாப்பு 

ஊட்டச்சத்து நிறைந்த உணவுப்பாதுகாப்பு 

வீடு குடிநீர் சுகாதாரம் 

கல்வி மருத்துவம் அனைவருக்கும் 

எங்கும் எதிலும் எண்மத் தொழில்நுட்பம் 

எங்கும் யாவர் முகத்திலும் மகிழ்ச்சிதான் பொங்கும். 

யாதும் ஊராய் யாவரும் கேளிராய் 

உலகிற்கே ஒளியாய் வழியாய் பிரதமராய் நான்.

தூண்டிலில் மாட்டிய குருட்டு மீன்

 தூண்டிலில் மாட்டிய குருட்டு மீன்

நானும் நண்பரும் தூண்டில் போட்டோம்

மீன்கள் வரிசையாக வந்து மாட்டின

அதில் ஒன்று குருட்டு மீன்.  பாவம் அதை விட்டுவிடு என்றார் நண்பர்.

நானும் பாவம் என்றேன். இதுநாள் வரையிலும் இந்த மீன் வாழ்க்கையோடு போராடியுள்ளது. இனிமேலும் இந்த மீன் கஷ்டப்படக் கூடாது. மீன் தனக்காகப் பிறக்கவில்லை. யாரோ ஒருவருக்கு உணவாகத்தான் பிறந்தது. எனவே இதை விடக்கூடாது. சமைத்து உண்ண வேண்டும் என்றேன். இந்த சிந்தனைக்கிடையே, கடவுளும் என்னைப்போல் சிந்தித்துத்தான் வாழ்க்கையின் விளிம்பில் வாழ்பவர்களின் உயிர்களைப் பறித்துக் கொள்கிறாரா? என்று தோன்றியது. இதயம் கனத்தது.

சிறந்ததில் சிறந்தவை

மலேசியக் கவிஞர் அ.முத்தரையனார்

அன்பினில் இன்பம் காண்போம்

அறத்தினில் நேர்மை காண்போம் 

துன்புறும் உயிர்கள் கண்டால் 

துரிசறு கனிவு காண்போம் 

வன்புகழ் கொடையில் காண்போம் 

வலிமையைப் போரில் காண்போம் 

தன் பிறப்புரிமை யாகத் 

தமிழ்மொழி போற்றக் காண்போம்.

கவிமணி தேசிக விநாயகனார்

ஆயிரம் பாவங்கள் செய்தவெல்லாம் -ஏழை 

ஆட்டின் தலையோடு அகன்றிடுமோ? 

தீயவும் நல்லவும் செய்தவரை விட்டுச் 

செல்வது ஒரு நாளும் இல்லை ஐயா!

புறநானூறு-கடலுள் மாய்ந்த இளம் பெருவழுதி

தமக்கென முயலா நோன்றாள்- பிறர்க்கென 

முயலுநர் உண்மையானே

முனிவிலர் துஞ்சலும் இலர்

வள்ளலார் 

வாடிய பயிரைக் கண்டபோதெல்லாம் வாடினேன்

எல்லாரும் இன்புற்று இருக்க நினைப்பதுவே

அல்லாமல் வேறொன்றும் அறியேன் பராபரமே

அன்னை தெரசா 

வாழ்க்கை என்பது 

நீ சாகும் வரை அல்ல 

மற்றவர் மனதில் 

நீ வாழும் வரை

தாராபாரதி 

தெய்வ வள்ளுவன் நெய்த குறள்தான் 

தேசம் உடுத்திய நூலாடை

அண்ணல் காந்தியின் சின்னக் கைத்தடி 

அறத்தின் ஊன்றுகோல்

கலீல் கிப்ரான் 

உழைக்கும் போது நீங்கள் 

புல்லாங் குழலாகிவிடுகிறீர்கள்

உங்கள் சுயத்துடன் 

நீங்கள் ஒருமைப்பாடு கொண்டிருக்கும் போது 

நீங்கள் நல்லவர்

பாரதிதாசன் 

இன்பத் தமிழ் கல்வி யாவரும் கற்றவர் 

என்று உரைக்கும் நிலை எய்தி விட்டால் 

துன்பங்கள் நீங்கும் சுகம் வரும் நெஞ்சினில் 

தூய்மை உண்டாகிடும் வீரம் வரும்!

நாலடியார்

வைப்புழிக் கோட்படா வாய்த்தீயிற் கேடில்லை 

மிக்க சிறப்பின் அரசர் செறின்வவ்வார் 

எச்சம் என ஒருவன் மக்கட்குச் செய்வன 

விச்சைமற்று அல்ல பிற

தனிப்பாடல் திரட்டு 

வெள்ளத்தால் அழியாது வெந்தணலால் 

வேகாது வேந்தராலும் 

கொள்ளத்தான் முடியாது கொடுத்தாலும் 

நிறைவன்றிக் குறைவுறாது 

கள்ளர்க்கோ பயமில்லை காவலுக்கு 

மிக எளிது கல்வி என்னும் 

உள்ள பொருள் உள்ளிருக்கப் புறத்தேயோர் 

பொருள் தேடி உழல்கின்றீரே

பாரதியார் 

நெஞ்சில் ஈரம் இன்றி 

நேர்மைத் திறமுமின்றி 

வஞ்சனை சொல்வாரடி - கிளியே 

வாய்ச்சொல்லில் வீரரடி 

கூட்டத்தில் கூடி நின்று 

கூவிப் பிதற்றலின்றி 

நாட்டத்தில் கொள்ளாரடீ - கிளியே 

நாளில் மறப்பாரடீ.

கண்கள் இரண்டினில் ஒன்றைக் - குத்தி 

காட்சி கெடுத்திடலாமோ?

ராஜ மார்த்தாண்டன்

அப்படியே நிற்கட்டும் அந்த மரம் 

குன்றுகளின் நடுவே மாமலை போல

கலாப்ரியா

குழந்தை 

வரைந்தது 

பறவைகளை மட்டுமே 

வானம் 

தானாக உருவானது

காவற்பெண்டு

ஈன்ற வயிறோ இதுவே 

தோன்றுவன் மாதோபோர்க்களத் தானே

திருமந்திரம்

துணையாய் வருவது தூய நற்கல்வி

தொல்காப்பியம்

ஒருகுறி கேட்போன் இருகால் கேட்பின் 

பெருக நூலில் பிழைபாடிலனே

முக்கால் கேட்பின் முறையறிந்து உரைக்கும்

வழக்கின் இலக்கணம் இழுக்கின்று அறிதல் 

பாடம் போற்றல் கேட்டவை நினைத்தல் 

ஆசான் சார்ந்து அவை அமைவரக் கேட்டல் 

அம்மாண்புடையோர் தம்மொடு பயிறல் 

வினாதல் வினவியவை விடுத்தல் என்று இன்னவை

கடனாக் கொளினே மடம் நனி இகக்கும்

அவர்கள் மூளையில் 

விதையைப் போல 

தூவப்பட வேண்டிய அறிவு 

ஆணியைப் போல 

அறையப்படுகின்றது 

விடுதலை

ஏழைகள் விடுதலை அடைய வேண்டுமானால் கண்டிப்பாகப் படித்தே ஆக வேண்டும்.

ஏழைகளுக்குச் சாப விமோசனம் தருவது கல்வியே ஆகும்.

வாழ்க்கை அனுபவத்தோடு தொடர்புடையது மட்டுமே கல்வி. மற்றவை எல்லாம் வெறும் ஏட்டுச் சுரைக்காய்.

உணர்ந்து கற்காத பாடம் எதுவும் பயன் தராது.  வாசிப்பதும் அது சார்ந்து யோசிப்பதும் கல்வியைப் பயனுள்ளதாக்கும்.

உழை

 

கஷ்டப்படாமல் வாழ வேண்டுமென்றால் முதலில் கஷ்டப்படு.

ஆயிரம் அண்டா சோற்றை ஒரே நாளில் தின்றுவிட முடியாது. ஆயிரம் நாட்களில் உழைக்க வேண்டிய வேலையை ஒரே நாளில் முடித்து விட முடியாது.

வெற்றி என்பது ஒரே நாளில் கிடைத்து விடாது. ஆனால், என்றாவது ஒரு நாள் நிச்சயம் கிடைக்கும். .

நல்ல நேரம் வரட்டும் என்று காத்திராதே!

நல்ல நேரம் என்று ஒன்று உண்டு என்றால் அது இந்த வினாடி மட்டுமே!

ஏதாவது செய்ய நினைத்தால் அதை இந்த வினாடியே செய்துவிடு!!

பொது

தனித்து இருக்கும் போது

பொதுநலமும்

பொதுவில் இருக்கும் போது

சுயநலமும்

புகுந்து விடுகிறது 

அறிவும் உறுதியும் உழைப்பும்

வறட்சிக் காலத்தில்

தன்னைத் தாங்கிப் பிடிக்கத்

தன் இலைகள் உதிர்க்கும் மரம்

தன் அழகு 

குலைவது குறித்துக்

கவலை கொள்வதில்லை!

கடுகினும் சிறுவிதை

காகம் குருவியினம் விதைத்த விதை

கரும்பாறையில் விழுந்தாலும்

கருத்துடனே உறுதியாய்

கருமுளையைப் பாய்ச்சிட்டே

கற்பாறையைப் பிளந்திடும்!

எதிர்வரும் மழையில்

தன் இனம் பிழைக்க

முன்னதாகவே இரைசேகரிக்கும் 

எறும்புக் கூட்டம்

முன்புத்தியின் அடையாளம்!

உணவகம்

உணவகங்களின் பெருக்கம்

நாகரிகத்தின் குறியீடு அல்ல!

பண்பாட்டுச் சிதைவு!

உடல்நலனுக்கு ஒவ்வாத

முற்றிலும் சூழலுக்கு மாறுபட்ட

உணவு ...உணவல்ல...விஷம்!

ஒரு வாழிடச் சூழலில்

வாழும் மரம்கூட

வேறிடச் சூழலில் வாழ முடிவதில்லை...

காலநிலைக்கும் 

வாழும் சூழலுக்கும்

ஏற்ற உணவே உணவு...

வீட்டுச் சமையலில்

பால் வேறுபாடு கூடாது.

அது அவரவர் 

வீட்டுச் சூழலைப் பொறுத்தது.

உழைப்பு

உழைப்பவருக்குத்தான் 

உழைப்பை மதிக்கத் தெரியும்!

தேரின் மேல் அமர்ந்து இருப்பவருக்குக்

குதிரையின் கால்வலி எப்படித் தெரியும்?

பிரசவத்தைப் பார்ப்பவரின் வலியும்

பிரசவித்த தாயின் வலியும் ஒன்றாகாது.

உழைப்பவரே உயர்ந்தவர்! - பிறர்

உழைப்பைத் திருடிப் பிழைப்பவர்

சிவிகையில் சிங்காரமாய் இருந்தாலும்

இழிந்தவரிலும் இழிந்தவரே!

தேனின் சுவையில் தேனீக்களின்

தெவிட்டாத தேடல் தெரிய வேண்டும்!

வெள்ளியென மின்னும் அன்னத்தின் சுவையில்

உழவனின் உழைப்பு ஒளிர வேண்டும்!!

இலவசமும் கட்டணமும்

அரசு வழங்கும் 

இலவசப் பொருள்களுக்கு எல்லாம் அதிகாரிகள் 

குறிப்பிடாத கட்டணங்களை 

பெற்றுக் கொண்டுதான் 

தருகிறார்கள். 

பெரு நிறுவனங்கள் 

விற்பனைப் பொருள்களுக்கெல்லாம் 

குறிப்பிட்ட இலவசங்களை 

அள்ளித் தருகின்றன. 

இலவசங்களில் எல்லாம் கட்டணங்கள். 

கட்டணங்களில் எல்லாம் இலவசங்கள். 

மதிப்புள்ள பொருளை எல்லாம் 

மதிப்பற்ற முறையில் வழங்கினால், 

அது அரசாங்கம். 

மதிப்பற்ற பொருளை எல்லாம் 

மதிப்புள்ள முறையில் வழங்கினால், 

அது பெருநிறுவனம்.

நாட்டை நல்லவர் ஆள்வதில்லை. ஏன்?

 பல நேரங்களில் ஒழுக்கம், நேர்மை, உண்மை போன்ற நல்லவற்றைப் பற்றிய சிந்தனைகளில் நான் ஆழ்வதுண்டு. நாட்டை ஆளும் தலைவர்களில் ஏன் நல்லவர்களைக் காண முடிவதில்லை என்று பல வேளைகளில் ஐயப்பட்டிருக்கிறேன். என்னுடைய சிந்தனைகளால், “கிணற்றுக்குள் தொலைத்த மோதிரத்தைத் தேடுவது” போல ஆழ்ந்து தேடி இருக்கிறேன். 

அப்போதெல்லாம் "இது கலிகாலம், தீயவர்களின் ஆதிக்க காலம், மக்களின் அறியாமைக் காலம்" என்று நினைத்திருக்கிறேன். 

"நல்லவர்கள் அரசியலுக்கு வர அஞ்சுகிறார்கள், அரசியல் ஒரு சாக்கடை என்று எண்ணுகிறார்கள்" என்றெல்லாம் சிந்தித்திருக்கிறேன். 

"அனைவரும் ஓட்டுப் போட்டால் தானே நல்லவர்கள் ஆட்சிக்கு வர முடியும்" என்று கூட சிந்தித்து இருக்கிறேன். 

"காசு வாங்கிட்டு அறியாமையால் அல்லது விசுவாசத்தால் ஓட்டு போட்டு தீயவர்களைத் தலைவராக்குகிறார்களே" என்று எண்ணி இருக்கிறேன்.

 "மக்கள் அனைவரும் நல்லவர்கள் தான். தனித்திருக்கும் போது மிகவும் நல்லவர்கள்". 

"தலைவர்கள் தான் மக்களைத் தவறாக வழி நடத்துகிறார்கள். அறியாமைக்கு ஆட்படுத்துகிறார்கள். மக்களைத் திசை திருப்புகிறார்கள். குழப்புகிறார்கள். ஆசையைக் காட்டி, ஆசையைத் தூண்டி மக்களை ஏமாற்றுகிறார்கள்" என்றுதான் இதுவரை எண்ணியிருக்கிறேன். 

ஒழுக்கம், நேர்மை, உண்மை போன்ற நல்ல குணங்களோடு கட்டுப்பாட்டோடு நல்லவனாய் எல்லா மனிதராலும் இருக்க முடிவதில்லை. நல்ல குணங்களை விரும்பி ஏற்றுக் கொண்டு மனக்கட்டுப்பாடு, சுயக் கட்டுப்பாடுடன் வாழ்பவர்கள் சிலரே. பெரும்பாலானோரால் அப்படி வாழ முடிவதில்லை. 

தன்னால்தான் சுயக் கட்டுப்பாடு, ஒழுக்கம் நேர்மையோடு வாழ முடியவில்லை என்று எண்ணும் பெரும்பான்மையானோர் தன்னைச் சூழ்ந்து இருப்பவர்கள் நல்லவர்களாகவே இருக்க வேண்டும் என்று எண்ணுகிறார்கள். 

ஆனால், அவர்கள் தன்னை ஆளத் தகுதியுள்ள நபரைத் தேர்ந்தெடுக்கும் போது மிகவும் எச்சரிக்கையுடன் செயல்படுகின்றனர். அதில் விஞ்சி நிற்பது தற்காப்பு. 

தன்னை விட நேர்மையானவரிடம் தன்னை ஆளும் தகுதியை ஒப்படைத்தால், தான் தவறிழைக்கும் போது நேர்மையாளன் தன்னைத் தண்டித்து விடுவான் என்கின்ற அச்ச உணர்வு மிகுதியால்தான், சொல்வதற்கெல்லாம் தலையாட்டும் நபரை அல்லது அரைகுறை அறிவுள்ளவனை அல்லது தவறுகளை மன்னிப்பவனை அல்லது அனுசரித்துச் செல்பவனை அல்லது தலையாட்டிப் பொம்மையைத் தேர்ந்தெடுக்க விரும்புகிறான். இத்தகைய சுயநலப் போக்கால்தான் நல்லவர்கள் தலைவர்களாக தேர்ந்தெடுக்கப்பட முடிவதில்லை. 

யார் தலைவனாக வேண்டும்? என்பதை விட, நல்லவர்கள் தலைவனாக வரக்கூடாது என்பதில் பெரும்பான்மையோர் மிகவும் கவனமாகச் செயல்படுகின்றனர். 

நல்லவன் தலைவனானால் என்ன நடக்கும்? குறைந்த ஒழுக்கம், குறைந்த கட்டுப்பாடு, குறைந்த நேர்மையை உடையவர்களுக்குத் திண்டாட்டம் தானே! அவர்களின் குற்றங்கள் கண்டிக்கப்படும் அல்லவா!! தண்டிக்கப்படும் அல்லவா!!! அந்த அச்ச உணர்வால் தான் நல்லவர்களை அவர்கள் தேர்ந்தெடுப்பதில்லை?!

பொன்னான பொன்மொழிகள்

இழப்பதற்கு எதுவும் இல்லை. ஆனால், உழைப்பதற்கு ஆயிரம் வழிகள் இருக்கின்றன.

உன் உழைப்பு ஒவ்வொன்றும் வெறும் வியர்வை அன்று. ஒவ்வொன்றும் வைரக்கல்.

உனக்கு நீயே நீதிபதியாக இரு. அப்போது தான் உன் தவறுகளுக்கு நீ தண்டனை தர முடியும்.

உன் மனச்சாட்சியே கடவுள். உன் கடவுளுக்கு எப்போதும் உண்மையாக இரு.

சிறகுகளை விரித்தால் பறக்கலாம். சிந்தையை அடக்கினால் செய்கையில் சிறக்கலாம்.

ஆயிரம் முறை தோற்றாலும் மீண்டும் ஒருமுறை முயற்சி செய்.

பலவீனத்திற்கான பரிகாரம் பலவீனத்தைப் பற்றியே சிந்தித்துக் கொண்டு இருப்பதல்ல. பலத்தைப் பற்றித்தான் சிந்திக்க வேண்டும்.

அஞ்சாமை தான் அறியாமை என்னும் மலையைத் தகர்த்து உடைக்கும் அணுகுண்டு

எந்தச் செயல் உன்னை வலிமையானவனாக உணர வைக்கிறதோ அச்செயலைத் திரும்பத் திரும்பச் செய்

வலிமை தான் வாழ்வு. வலிமைதான் மகிழ்ச்சி. பலவீனம் இடைவிடாத சித்திரவதை ஆகவும் துன்பமாகவும் அமையும் என்பதால், உனது வலிமையைப் பெருக்குவதிலேயே உன்னுடைய வாழ்க்கையைச் செலவிடு.

மலைகளைத் தகர்க்கும் மன உறுதி வேண்டும். தோல்வியுற்ற வாழ்க்கை வாழ்வதைவிட போர்க்களத்திலே போரிட்டு மடிவதே மேல். தோல்வியுற்ற வாழ்க்கை துயரமானது. வென்றே ஆக வேண்டும்.

ஒவ்வொருவரும் தனது அதிகபட்ச ஆற்றலை மிச்சம் மீதியின்றிச் செலுத்தி உழைக்காவிட்டால் எதையும் சாதிக்க இயலாது.

அளவற்ற ஆற்றல், பெரும் ஊக்கம், அளவு கடந்த அஞ்சாமை, அளவற்ற பொறுமை இவை நான்கும் அவசியம்.

எல்லா ஆற்றல்களும் உனக்குள்ளேதான் இருக்கின்றன. அதை நீ உணர வேண்டும் என்றால், நீ உன் மீது அளவற்ற நம்பிக்கை வைக்க வேண்டும்.

மரணம் என்பது உடையை மாற்றுவது போலதான். அதனால் மரணத்திற்கு அஞ்சாதே.

சுற்றுப்புறத்தைச் சுவாசி

ஆபத்துக் காலத்தில் துண்டான பல்லியின் வால் முளைப்பது எப்படி?

மின்மினி பூச்சியின் வால் பகுதி ஒளிரும் ரகசியம் என்ன?

பருவகாலத்தை முன்னரே அறியும் கட்டெறும்பின் மூளைத்திறன் என்ன?

வசந்த காலத்திற்காக இலையை உதிர்த்து தளிர்த்துக் காத்திருக்கும் மரத்தின் அறிவாற்றல் என்ன? என்பன போன்ற வினாக்களை எழுப்பி விடைதேடும் சித்தராய் சிந்தனையைச் சீர்திருத்தி வை.

சுற்றுப்புறத்தை உற்றுநோக்கி சிந்தனையில் கரைந்து போ.

அது உன்னை ஞானி ஆக்கும்.

விஞ்ஞானி ஆக்கும்.

சோம்பல் விலக்கு!

சோம்பல் விலக்கு!

வெட்டுப்படாமல்

வைரம் மின்னுமா?

கசக்கும் மருந்தின்றி

நோய் குணமாகுமா?

உளி படாமல்

கல் சிலையாகுமா?

முத்துக்குளிக்காமல்

முத்தெடுக்க முடியுமா?

முடியாதல்லவா?

நீ சோம்பி இருந்து

என்ன பயன்?

துன்பத்தை வேண்டு

துன்பத்தை வேண்டு

இருட்டைக் காணாதவன்

விடியலை உணர மாட்டான்..!

வெயிலில் வாடாதவன்

நிழலை விரும்ப மாட்டான்..!

துன்பத்தை அறியாதவன்

இன்பத்தில் மகிழ மாட்டான்...!

துன்பமே இன்பத்திற்கான வித்து!

முதலில் துன்பம்...

அதன்பின் பேரின்பம்!

துன்பம் வரின்

கவலை வேண்டாம்...

கலங்காதிரு...

பூட்டைக் கொடுத்தவனிடம்

சாவி நிச்சயம் இருக்கும் ...!

எதிர்கொள் மனமே..!

 எதிர்கொள் மனமே..!

உன்னால் முடியும் என்று

நம்பிதான்

கடவுள் எனக்கு

நிறைய துன்பம் தருகிறார்.

கடவுள் என்மீது வைத்த

நம்பிக்கையை

வீணாக்க மாட்டேன்...

அசைவம்

அசைவம் விரும்பிகள் 

பாதகச் செயல்களில் 

சமரசம் செய்து கொள்வார்கள்

கசாப்பு கடைக்காரர் எதற்கு அஞ்சுவார்?

எங்கே செல்கிறது மனித இனம்?- எங்கே செல்ல வேண்டும் புனித இனம்?

 யுகம் யுகமாய் மனித உடல்கள்... 

குவியல் குவியலாய்த் தோன்றி அழிந்தன.

ஒவ்வொரு சிதையிலும் வரலாறு நீள்கிறது.

உடல்கள் உருவாக்கி விட்டுச் சென்ற எச்சங்கள் 

மலை மலையாய் நீண்டு போகின்றன...

வசதிகளைப் பெருக்கிப் பெருக்கி 

வாழிடச் சூழலைச் சிதைத்துச் சிதைத்து 

என்ன செய்யப் போகிறான்? 

குப்பை கொட்டி அதில் குடியிருக்கவா? 

மண்ணை விஷமாக்கி மரம் நட்டு 

நச்சுக்கனி பறித்து உண்ணவா? 

வாழும் நெறியை விட்டுச் சென்றான் பாட்டன் 

வாழும் வழியை அடைத்துச் செல்கிறானே எங்கப்பன்! 

இயற்கையோடு கொஞ்சி விளையாடினானே என் பாட்டன்! 

இயற்கைக்கு நஞ்சு புகட்டுகிறானே எங்கப்பன்!

உல்லாச வாழ்க்கையால் உருக்குலைந்த கருவறை! 

எப்படிப் பிழைக்கும் எங்கள் தலைமுறை?!

நீ தலைவனா? தொண்டனா?

 நீ தலைவனா? தொண்டனா?

ஒப்பு உயர்வில்லாத ஒன்றைத் தேடும் மனம், கடைசித் தோல்வியிலிருந்து தப்புவதற்காக, “அதனோடு நான், அதுதான் நான்” என்று நிழலையும் பிரதி எடுக்கிறது. எல்லா முயற்சிகளையும் கைவிட்டு சாதனையுடன் சமரசம் கொள்கிறது. இறந்த காலத்தின் ஏற்ற இறக்கங்களையும் எதிர்காலத்தின் இலக்குப் பயணத்தையும் அது பொருட்படுத்துவதில்லை. அற்ப வெற்றிகளைக் கொண்டாடித் தீர்க்கும் அதே வேளையில், அற்ப தோல்விகளுக்குக் கூட ஆண்டவனையே காரணமாகச் சுட்டும். குழப்பமான தெளிவையும் தெளிவான குழப்பத்தையும் மாறி மாறி கொண்டிருக்கும். அது சாதனையாளனைத் தனது தலைவனாக ஏற்கும். தன்னைத் தொண்டனாகக் கருதும். தலைவனது பாதையை, அருஞ்செயல்களைப் புகழும். ஆனால் தலைவனது முயற்சியைச் பரிட்சித்துப் பார்க்காது. “தலைவனால்தான் முடியும், தன்னால் முடியாது” என்று ஒதுங்கிக் கொள்ளும். யாவரிடமும் தன்னுடைய தலைவன், ‘அவர்’ என்று அறிமுகம் செய்வதைப் பெருமையாகக் கருதும். பகட்டுக்காக பால்குடம், காவடி எல்லாம் கூட எடுக்கும். ஆனால் கிஞ்சித்தும் கூட தலைவனது வழியில் நடவாது.

அப்துல் கலாம் காந்தி, நேரு, தெரேசா, கென்னடி, ஆபிரகாம் லிங்கன், அலெக்சாண்டர், மாவீரன் நெப்போலியன், விவேகானந்தர், நேதாஜி என்று பெயர் வைப்பார். நிறுவனங்கள் வைப்பார். தொண்டு என்பார். உதவி செய்கிறேன் என்பார். ஆனால் தலைவர்களின் நேர்மை இராது. உண்மை இராது. அன்பு இராது. உதவி செய்கிறேன் என்பார்- அருள் இராது. தலைவனின் சொல்லை, செயலைப் பின்பற்றாதவன் தொண்டன் இல்லை. வெறும் பகட்டுக்காக தலைவனின் பெயரைக் கூறிக் கொள்பவன், பச்சை குத்துபவன், வாகனத்தில் உருவம் பொறிப்பவன் எல்லாம் வாழும்போதே கோழைகள். அடிமைகள். கட்சிக்குத் தொண்டன் என்பான்- கொள்கை அறிய மாட்டான். நடிகனைத் தலைவன் என்பான்- நடிகனின் குணமோ பிறவோ அறிய மாட்டான். காந்திய வழி என்பான்- அகிம்சை அறியமாட்டான்.

காணும் பிறவிகள் அனைத்தும் தனித்துவமானவை. ஒன்றை மற்றொன்றுடன் ஒப்பிடுவது அபத்தமானது. சிந்திக்கும் திறன் படைத்த மனித இனம் பகுத்து, ஆராய்ந்து தன்னைத் தானே பண்படுத்திக் கொள்ள முடியும். தன்னை- தன்னுடையதை அடையாளம் கண்டு ஒருமுகப்படுத்தி, சுற்றுப்புறத்தில் இருந்து அறிந்து கொண்டு பெருமுயற்சியுடன் பயிற்சி செய்து ஆற்றலைப் பெருக்கி, மனித இனம் வளமடைய அருஞ்செயல்களை ஒவ்வொருவராலும் ஆற்ற முடியும். ஒருமுகப்படுத்தலிலும் முயற்சியிலும் பயிற்சியிலும் காணப்படும் வேறுபாடுகளே தலைவன்- தொண்டனைத் தீர்மானிக்கின்றன. ஆற்றலில் குறைந்தவன் தொண்டனாக அடையாளப்படுத்தப்படும்படி ஆகிவிடக்கூடாது.

காந்தி மட்டுமே காந்தியாக இருக்க முடியும். நேதாஜி மட்டுமே நேதாஜியாக இருக்க முடியும். கலாம் மட்டுமே கலாமாக இருக்க முடியும். விவேகானந்தர் மட்டுமே விவேகானந்தராக இருக்க முடியும். மற்றவர்களால் காந்தியாகவோ நேதாஜியாகவோ இருக்க முடியாது. இருக்கவும் கூடாது ஆனால் மனிதப் பண்புகள் அனைவருக்கும் உரியவை. அனைவராலும் பின்பற்ற முடியும். அன்பு, நேர்மை, உண்மை, அகிம்சை, வீரம், இரக்கம், ஒப்புரவு, பக்தி, பகுத்தறிவு, அறிவாற்றல், செயல்திட்பம் போன்றவற்றை அனைவரும் பெற்றிருப்பதே சிறந்தது. அல்லது அவற்றைப் பெறுவதற்கான முயற்சிகளில் சிரத்தையுடன் ஈடுபட்டு இருப்பதே சிறந்தது. அப்படிப்பட்ட மனித வாழ்க்கையைத்தான் மனம் நாட வேண்டும். தலைவனைத் தேடி அல்ல. தலைவன் என்பவர் யார்? மனிதப் பண்புகளில் சிறந்தவன் தானே! நாம் பின்பற்ற வேண்டியது தலைவனை அல்ல! தலைமைப் பண்பை! மனிதப் பண்பை! இளம் தலைமுறைக்கு கற்றுக் கொடுக்க வேண்டியவை தலைவர்களின் பிறந்தநாள் கொண்டாட்டங்களை அல்ல. கொண்டாடப்பட வேண்டியவர்கள் சாதித்தலைவர்கள் அல்லர். அவர்கள் கடைபிடித்த மனிதப் பண்புகளைத்தான் கொண்டாட வேண்டும். அப்பண்புகளைத்தான் வளர்க்க வேண்டும். அதுதான் நம்முடைய கடமை. அதை விட்டுவிட்டு சல்லிப் பைசாவுக்கும் பிரயோஜனம் இல்லாத நடிகனையோ, கட்சித் தலைவனையோ தன்னுடைய தலைவனாக ஏற்பது என்பது மனித குணமே இல்லை. அது மூடத்தனம். உலகத்தை ஓர்மைச் சிந்தனையுடன் பார்ப்பதே மனிதப் பண்பு. தொண்டன் தன்னைத் தனித்துப்பார்ப்பான். நீ தலைவனா? தொண்டனா?

அனைத்தும் அவன்

உருவ கேலி செய்பவன் 

இறைவனைக் கேலிசெய்கிறான்...

இழிசொல்லால் இகழ்பவன் 

இறைவனை இகழ்கிறான்...

மனிதனை வதைப்பவன்

இறைவனை வதைக்கிறான்...

அனைத்துமாய் அவன் இருக்கிறான்.

அனைத்துமாய் அவனைக் காண்பவன் தவறிழைக்க மாட்டான்.

கோவில்

கோவிலுக்குச் செல்லவும் அஞ்சுகிறேன்...

கணக்கற்ற காணிக்கைகள்...

கடவுளைக் காண ..!

பணம்

அழுக்கு படிந்து காணப்படுவது

ஏழைகளின் பணம் மட்டுமே

குணம் அல்ல..

கொடிப்பாடல்

தாயின் மணிக்கொடி பாரீர் - அதைத்

தாழ்ந்து பணிந்து புகழ்ந்திட வாரீர்

தாயின் மணிக்கொடி பாரீர்

ஓங்கி வளர்ந்ததோர் கம்பம் -அதன்

உச்சியின் மேல் வந்தேமாதரம் என்றே 

பாங்கின் எழுதித் திகழும்- செய்ய

பட்டொளி வீசிப் பறந்தது பாரீர்

தாயின் மணிக்கொடி பாரீர் - அதைத்

தாழ்ந்து பணிந்து புகழ்ந்திட வாரீர்

தாயின் மணிக்கொடி பாரீர்

கம்பத்தின் கீழ்நிற்றல் காணீர்- எங்கும் 

காண்அரும் வீரர் பெரும் திருக்கூட்டம் 

நம்பற்குஉரியர் அவ்வீரர் -தங்கள்

நல்லுயிர் ஈந்தும் கொடியினைக் காப்பார்

தாயின் மணிக்கொடி பாரீர் - அதைத்

தாழ்ந்து பணிந்து புகழ்ந்திட வாரீர்

தாயின் மணிக்கொடி பாரீர்

பெற்ற சுதந்திரத்தைப் பேணிக் காப்போம்

இன்று பொன்னான நாள் (2)

இன்று மகத்தான திருநாள்(2)-

ஆம்.

மகாத்மாக்கள் இன்னுயிர் ஈந்து விடுதலை பெற்றுத் தந்த விடுதலைத் திருநாள். 140 கோடி இந்தியர்களும் மகிழ்ந்திருக்கும் 75 ஆவது சுதந்திரப் பெருநாள்.

மேலைநாட்டுக் கல்வியும் சட்டமும் படித்த இளைஞர்கள், அரசியல் விடுதலை கோரிப் போராடினர். பாதிக்கப்பட்ட சிப்பாய்களும் பதவி இழந்த மன்னர்களும் மனம் கசந்தனர். வரிச் சுமையால் பசிபட்டினிக்கு ஆட்பட்ட விவசாயிகளும் நலிவடைந்த கைவினைக் கலைஞர்களும் பெருந்துயரம் அடைந்தனர்.

ஆங்காங்கே பற்றி எரிந்த விடுதலை வேள்வித்தீயை மகாத்மாக்கள் ஒருங்கிணைத்தனர். திட்டமிட்ட அகிம்சைப் போராட்டங்களால் ஆங்கிலேய அரசு திணறியது; இந்தியத் தலைவர்களிடம் ஆட்சியை ஒப்படைத்து விட்டு வெளியேறியது.

சுதந்திர இந்தியா பிறந்தது (2).

வறுமையையும் வேலையின்மையையும் ஒழிக்கத் திட்டமிட்ட பாதையை அரசு தேர்ந்தெடுத்தது. கல்வி வளர்ச்சியை ஊக்குவித்தது. நேர்மையான தேர்தல்களை நடத்தி மக்களாட்சி ஜனநாயகத்தை வலுப்படுத்தியது. வேளாண்மைப் புரட்சி மூலம் வறுமையை ஒழித்தது. தொழிற்புரட்சி மூலம் வேலையின்மையைக் குறைத்தது. பொதுத்துறை நிறுவனங்கள் சமதர்ம பொருளாதாரத்தைத் தூக்கி நிறுத்தின.

உலகப் பொருளாதாரத்தோடு போட்டியிடும் வகையில் தனியார்மயமாதல், தாராளமயமாதல், உலகமயமாதல் போன்ற கொள்கைகளை அரசு பின்பற்றியது. இன்று தவிர்க்க முடியாத இடத்தை இந்தியா பிடித்திருக்கிறது. அறிவியல், மருத்துவம், தொழில்நுட்பம், விண்வெளி, பாதுகாப்பு என்று அனைத்துத் துறைகளிலும் இந்தியா கோலோச்சி வருகிறது.

சமூக அமைதி மற்றும் ஒழுங்குடன் நிலையான வளர்ச்சியைப் பெற்றிருக்கும் இந்தியத் திருநாட்டில் ஊறுவிளைவிக்கும் வகையில் தீவிரவாதம், பிராந்தியவாதம், மதவாதம் ஆகியவை தலைதூக்கி வருவது சவாலானதாகவே இருக்கிறது.

'நாம் அனைவரும் இந்தியர்' என்ற உணர்வை மேலோங்கச் செய்வதன் மூலம் இவ்வகையான தீங்குகளை விரட்டலாம். "நாம் அனைவரும் உடன் பிறந்த சகோதரர்" என்ற உணர்வோடு பழகுவதன் மூலம் வேற்றுமைகளைக் களையலாம்.

இன்றும் இந்தியா அரசியல் சமூகப் பொருளாதாரச் சவால்களை எதிர்கொண்டு வருகிறது. அரசியலில் பெண்களின் பங்கேற்பு மிகவும் குறைவாகவே உள்ளது. கல்வியிலும் வேலைவாய்ப்பிலும் பெண்கள் விரைவான வளர்ச்சியை எட்டி வரும் சூழலில் பெண்கள் மற்றும் குழந்தைகளுக்கு எதிரான வன்முறைகள் விரும்பத்தக்கதல்ல. கொரோனாப் பேரிடரை இந்தியா சிறப்பாக எதிர்கொண்டு வரும் வேளையில் கல்விநிறுவனங்களில் ஆங்காங்கே நடைபெறும் விரும்பத் தகாத நிகழ்வுகள் சமூகத் தலைக்குனிவை ஏற்படுத்துகின்றன.

சில அரசியல் கட்சிகள் இனவாதம், பிராந்தியவாதம் மற்றும் மொழிப் பிரச்சனைகளை மையப்படுத்தி பிரச்சாரங்கள், பொதுக்கூட்டங்கள், போராட்டங்கள் நடத்துவது தேசப்பற்றுக்கு குந்தகம் விளைவிக்கின்றன. தேசப்பற்றுக்கு ஊறு விளைவிக்காமல் அரசியல் கட்சிகள் தங்கள் பிரச்சாரங்களை முன்னெடுக்க வேண்டியது அவசியமாகிறது.

இந்தியா பன்முகத்தன்மையும் பன்முகக் கலாச்சாரத்தையும் கொண்ட ஒரு பூந்தோட்டம். மணமுள்ள பூ, நிறமுள்ள பூ, மணமும் நிறமும் உள்ள பூக்கள் எனப்பலவகைகள் உண்டு. வேண்டாத பூ என்று எதுவும் இல்லை. அப்படிப்பட்ட இந்திய தேசத்தில், ஆளும் அரசியல் கட்சிகள் பன்முகத்தன்மைக்கு எதிரான சட்டங்கள் மற்றும் நிர்வாகத்தை நடைமுறைப்படுத்த  முயல்வது அரசியல் அமைப்பின் கண்ணியத்தை சீர்குலைக்கும் நடவடிக்கையாகும்.

அரசியலில், சமூகத்தில், பொருளாதாரத்தில் சமத்துவத்தைப் பேண இடஒதுக்கீட்டு கொள்கை சீரான ஆய்வுகளுக்கு உட்படுத்தப்பட்டு முறையாக நடைமுறைப்படுத்தப்பட வேண்டும். எல்லாத் தருணங்களிலும் அரசியலமைப்பின் மாண்பு குலையாமல் பாதுகாக்க வேண்டியது உச்ச நீதிமன்றத்தின் கடமை மட்டுமல்ல; நம் ஒவ்வொருவரின் கடமை ஆகும்.  இதை மனத்தில் கொண்டு வாழ்வதே சுதந்திரப் போராட்டத் தியாகிகளுக்கு நாம் செலுத்தும் நன்றிக்கடன் ஆகும். அதுவே பெற்ற சுதந்திரத்தை பேணிக்காக்கும் வழியும் ஆகும்.

இந்த நல்ல தருணத்தில் எனக்கு பேச வாய்ப்பளித்த அனைவருக்கும் நன்றி கூறி விடைபெறுகிறேன். நன்றி! வணக்கம்!

சுதந்திரத்தை போற்றுவோம் கவிதை

போற்றுவோம் சுதந்திரத்தை... போற்றுவோம் சுதந்திரத்தை...

அனைவரும் கல்வி பெற்றோம்

அருமை உலகின் அறிவு பெற்றோம்(2)

ஆட்சி செய்யத் தேர்தல் வைத்தோம்

ஆளும் பொறுப்பைக் கொடுத்து வைத்தோம்(2)

எழுதப் படிக்கக் கற்றுக் கொண்டோம்

எழுத, பேச உரிமை கொண்டோம்(2)

சட்டத்தின் முன் சமமாய் நின்றோம்

சமத்துவமே நீதி என்றோம்(2)

தீமை தரும் தீண்டாமை ஒழித்தோம்

தீண்டாதோர்க்கு ஒதுக்கீடு தந்தோம்(2)

விடுதலை பெற்ற தாய்நாட்டில்,

விரும்பும் கல்வி கற்றிடலாம்

வேண்டிய உயரம் பறந்திடலாம்

விரும்பும் வேலை செய்திடலாம்

பிடித்த ஊரில் தங்கிடலாம்

விரும்பும் தெய்வம் வணங்கிடலாம்

நம்பும் மதத்தைப் பரப்பிடலாம்

தகுதிக்கேற்ற வேலையும் உழைப்புக்கேற்ற ஊதியமும் 

பணியிடத்தில் பாதுகாப்பும் சுதந்திரத்தால் உருவாக்கினோம்.

ஆண் பெண்ணில் வேறுபாடில்லை

சாதி மத பேதமுமில்லை(2)

சகோதரராய் 

சமத்துவ வழியில் சங்கமம் கொள்வோம், வாரீர்!(2)

நான் விரும்பும் தலைவர் அப்துல் கலாம் பேச்சு போட்டி

அவையோர்க்கும் இங்கே கூடியிருக்கும் சபையோருக்கும் என் அன்பு வணக்கத்தைக் காணிக்கையாக்குகிறேன்.

அவர் மகான் இல்லை- ஆனால் 

உத்தம மனிதர் (2)

அவர் அதிசயம் செய்தாரில்லை -ஆனால்

ஆளுமை மனிதர் (2)

அவர் வசீகர மனிதரில்லை- ஆனால்

கனவுகளைத் துரத்தியவர்(2)

ஆம்.வல்லரசு இந்தியா 

வளமான இந்தியா 

வறுமை இல்லா இந்தியா 

என்ற கனவுகளைத் துரத்திய என் கனவு நாயகன்.

ஆவுல் பக்கீர் ஜெயினுலாப்தின் அப்துல் கலாம். 

நான் விரும்பும் தலைவர் அவரே!

மிகவும் எளிமையான குடும்பத்தில் பிறந்தவர். நாட்டின் முதல் குடிமகனாகச் சேவை ஆற்றிய போதும் எளிமையாகவே வாழ்ந்தவர்.

இரண்டு சூட்கேசுகளுடன் குடியரசுத் தலைவர் மாளிகைக்குள் நுழைந்தவர். ஐந்து ஆண்டுகளுக்குப் பிறகும் அப்படியே திரும்பினார். கறை ஏதுமில்லாத வெள்ளை மனிதர் 

நாட்டின் கடைக்கோடியில் பிறந்தவர். நாட்டின் முதல் குடிமகனாக மலர்ந்தவர்.

"இளமையில் வறுமை கொடிது" என்பார்கள். வறுமை அவருக்குக் கற்றுத் தந்த பாடம், அவரை,

ஒழுக்க சீலராக்கியது 

உயர்ந்த பண்பாளராக்கியது 

கடின உழைப்பாளராக்கியது. 

அவர் அசைவம் விரும்பாதவர் 

வல்லரசு இந்தியாவை விரும்பியவர்(2)

அவர் திருமணம் புரியாதவர்

எவருக்கும் தீமை புரியாதவர்.(2)

அக்னி, ஆகாஷ், பிருத்திவி என்று ஏவுகணைகளில் தொழில்நுட்பத்தை மேம்படுத்திய ஏவுகணை நாயகன்.

அணு வெடிப்புச் சோதனை நடத்திய பொக்ரான் நாயகன்.

எதிர்கால இந்தியா இளைஞர்களின் கைகளில் உள்ளது என்று கருதியவர். 

இளைஞர்களை அரசியலுக்கு அழைத்தவர். 

இளைஞர்களைத் தேடிச் சென்று அவர்களிடையே இந்தியா பற்றிய கனவுகளை விதைத்தவர். 

இளைஞர்களை ஊக்கப்படுத்துவதிலேயே தன் இறுதிக்காலத்தைச் செலவிட்டவர். 

அவரது இறுதி மூச்சிலும் பேச்சிலும் வல்லரசு இந்தியாவின் தீப்பொறி கலந்திருந்தது.

அவர் பழகுவதில் குழந்தை 

சிந்திப்பதில் ஞானி 

மாணவர்களுக்கு நண்பன் 

நாட்டு மக்களுக்கு எளிய வழிகாட்டி

 விமர்சனம் செய்ய முடியாத தலைவர் அவர் 

அவரே நான் விரும்பும் தலைவர் என்று கூறி, வாய்ப்புக்கு நன்றி கூறி, விடைபெறுகிறேன். நன்றி, வணக்கம்!

கல்விப் பணியில் காமராசர் பேச்சுப்போட்டி வகுப்பு 5

இங்கு கூடியிருக்கும் அனைவருக்கும் என் வணக்கத்தைத் தெரிவித்துக் கொள்கிறேன்.

பட்டினி கிடப்பவருக்கே பசியின் கொடுமை புரியும்.

வெயிலில் கிடப்பவருக்கே நிழலின் அருமை தெரியும்.

அதைப்போல,

படிக்க வாய்ப்பு இல்லாத காமராசர் படிப்பின் அவசியம் அறிந்தவர்.

1. வெள்ளத்தால் போகாது 
2. வெந்தணலால் வேகாது 
3. வேந்தராலும் கொள்ளத்தான் முடியாது
4. கள்ளர்க்கோ பயமில்லை 
5. காவலுக்கு மிக எளிது 
6. கொடுத்தாலும் நிறைவன்றிக் குறைபடாது.- கல்வி.

பசியோடு இருப்பவனுக்கு மீன்பிடித்துத் தருவதை விட, மீன்பிடிக்கக் கற்றுத் தருவதே சாலச் சிறந்தது.

அதுபோல,

ஏழ்மை நிலையில் இருப்பவர்களுக்குக் கல்வியைக் கொடுத்து விட்டால் அவர்களுடைய வாழ்வு மலரும் என்று சிந்தித்தார் காமராசர்.

காமராசர் 9 ஆண்டுகள் முதலமைச்சராகப் பதவி வகித்தபோது கல்வித் துறைக்கு அதிக முக்கியத்துவம் கொடுத்தார்.

1. மூடப்பட இருந்த 6000 பள்ளிகளைத் திறந்தார்
2. ஒரு மைல் தூரத்தில் தொடக்கப்பள்ளி
3. மூன்று மைல் தூரத்தில் நடுநிலைப்பள்ளி
4. ஐந்து மைல் தூரத்தில் உயர்நிலைப்பள்ளி என்று திட்டம் வகுத்து பட்டி தொட்டி எங்கும் 17 ஆயிரம் புதிய பள்ளிகளைத் திறந்தார்.
5. கல்வியை இலவசமாகவும் கட்டாயமாகவும் ஆக்கினார்.
6. மாணவர்களின் மதியவேளை பசியைப் போக்க மதிய உணவுத் திட்டம் கொண்டு வந்தார்.
7. மாணவர்களுக்கு முறையான தரமான கல்வி கிடைக்க ஆசிரியர் பயிற்சிப் பள்ளிகளைத் திறந்தார்.
8. மாணவர்கள் இடையே ஏழை-பணக்காரர் வேறுபாடுகளை நீக்க இலவசச் சீருடைத் திட்டத்தைக் கொண்டு வந்தார்.
9. பள்ளி வளர்ச்சிக்காக அரசிடம் போதிய நிதி இல்லாத போது, பள்ளிச் சீரமைப்பு மாநாடுகளை நடத்தி செல்வந்தர்களின் உதவியோடு பள்ளிக்கு வேண்டிய வசதிகளை ஏற்படுத்தினார்.
10. தொழிற்பயிற்சி நிறுவனங்கள், செவிலியர் பயிற்சி நிறுவனங்கள், பொறியியல் கல்லூரிகள், மருத்துவக் கல்லூரிகள் போன்ற உயர்கல்வி நிறுவனங்களை நிறுவினார்.
11. கல்வி கற்ற சமுதாயமே மேம்படும் என்று உறுதியாக நம்பினார்.
12. கல்வி கற்றோர் சதவீதத்தை ஏழிலிருந்து 37 ஆக உயர்த்தினார்.
13. காமராசர் அமைத்த அடித்தளத்தில், இன்று வானளாவிய கட்டங்களாக கல்வித்துறை நிமிர்ந்து நிற்கிறது.

அவரின் சீரிய பணிக்குத் தலை வணங்குவோம். அவரின் சீரிய வழியில் வீரநடை போடுவோம். வாரீர்!

நன்றி, வணக்கம்.

காமராசர் பேச்சுப்போட்டி- வகுப்பு 2

இங்கே கூடியிருக்கும் அனைத்து நல்ல உள்ளங்களுக்கும் என் வணக்கத்தைத் தெரிவித்துக் கொள்கிறேன்.

மண்ணுக்குள் இருக்கின்ற கரி தான் வெட்ட வெட்ட வைரமாய் மின்னுது. 

அதுபோல, 

1. ஒருபுறம் வறுமை வாட்ட வாட்ட, 
2. மறுபுறம் விடுதலை வேட்கை மேலே ஏழ ஏழ, 
3. இன்னொரு புறம் சிறையில் துன்பம் வருத்த வருத்த, 
4. தியாகச் சுடராய், வேள்வித்தீயாய், 
5. நம் தேசத்திற்கு அழியாத விளக்காய் ஒளி தந்தவர் காமராசர்.

• தமிழகத்தின் தவப் புதல்வர்
• தாயகம் காத்த புனிதர்
• கருப்புக் காந்தி
• ஏழைப் பங்காளர் என்று பாராட்டப்பட்டவர்

1. அரசியலைச் சுத்தப்படுத்தியவர்
2. ஆட்சியில் நேர்மை செலுத்தியவர்
3. பள்ளிக்கூடங்கள் பல திறந்தவர்
4. மாணவர்களுக்கு மதிய உணவு தந்தவர்
5. வளர்ச்சித் திட்டங்கள் பல தீட்டி, நாட்டை வளப்படுத்தியவர்

• ஏழை எளியோர் வாழ்வில்  நல்லொளி பாய்ச்சிய நம்பிக்கை நட்சத்திரம்.
• கர்மவீரர் காமராசரின் பிறந்தநாளில், அவரின் சீரிய வழியில் வீரநடை போடுவோம், வாரீர்.

நன்றி! வணக்கம்.

காமராஜர் கவிதை

விருதுநகரில் பிறந்தவர்
விருதுகளின் நாயகர்

விடுதலைப் போராட்ட வீரர்
தீரர் சத்தியமூர்த்தியின் சீடர் 

படிப்பின் அருமை உணர்ந்தவர்
பல்லாயிரம் பள்ளிகள் திறந்தவர்

காந்தியத்தின் பாதை கண்டவர்
கடமையில் நேர்மை கொண்டவர்

பொதுத்துறை நிறுவனம் கண்டவர்
பொதுநல வாழ்க்கை கொண்டவர்

மும்முறை முதல்வரான உத்தமர்
பிரதமர்களை உருவாக்கிய பிதாமகர்

காமராஜர் திட்டம் தீட்டியவர்
கட்சிப் பணி ஆற்றியவர்

காட்சிக்கு மிக எளியவர்
கடமைக்கு உரியவர்

கால்நடை மேய்ப்போர் நலச்சங்கம்

முல்லை நிலக் காவலர்களே...

மூத்தகுடி மக்களே...(2)

வெள்ளாடு மேய்ப்பவர்களே...

வெள்ளை உள்ள வேந்தர்களே...(2)

கால்நடையின் பசி தீர்க்கும் ஆயர்குடியே...

கால்நடையாய்க் கானகம் சுற்றும் வீரர்குடியே...(2)

இயற்கை போற்றும் மனிதர்களே...

இயற்கை வேளாண்மை காக்கும் புனிதர்களே...(2)

உங்கள் வாழ்வும்

உங்கள் குலமும்

உலகம் உள்ளவரை

உயர்ந்து நிற்கட்டும்..! (2)

வாழ்த்துரை

1. நீதித் தராசின் நடுமுள்ளே ...! நேர்மையின் சுகம் விரும்பியே ...! (2 முறை)
2. பள்ளத்தை நோக்கிப் பாய்ந்த ஜீவநதியே-நல்லோர் உள்ளத்தைக் கொள்ளைகொண்ட நாயகரே...!(2)
3. கேள்விகளால் வேள்வி பல செய்த வித்தகரே...! குரலற்ற மக்களின் குரலாய் ஒலித்தவரே..! (2)
4. விளிம்பு நிலை மக்களின் விடிவெள்ளியே...! அநீதிக்குக் கிருபை காட்டாத கிருபாகரரே...! (2)
5. தாயிடம் முரண்படும் குழந்தை போல நீதியிடம் சட்டம் முரண்படும்போதெல்லாம் நீதியின் பக்கம் நின்ற சட்டகர்த்தாவே...!(1)
6. 7.5% இட ஒதுக்கீட்டில் ஏழை மாணவர்களின் இன்னல் தீர்த்தவரே...!(1)
7. தமிழ்வழி இடஒதுக்கீட்டில் தமிழ் மாணவர்களின் நலன் காத்தவரே...!
8. வியர்வையின் மதிப்பை உணர்ந்தவரே..!-ஏழையின் உயர்வை உள்ளத்தில் இருத்தியவரே..!(2)
9. இயற்கை ஆர்வலரே... சூழல் காவலரே...!(2)
10. வாய்மையைக் கடைப்பிடிக்கும் ஒளிர் தங்கமே...! ஒப்பற்ற உம்புகழ் பரவும் எங்குமே!!! (2)

நீர் வாழ்க... உம் குலம் வாழ்க... என்று வாழ்த்தி, இவ்விழாவிற்கு வருக... வருக...என வரவேற்று என்  வரவேற்புரையை நிறைவு செய்கிறேன். நன்றி..!

அநீதி

அநீதி கண்டு அமைதி காப்பது குற்றம்.

வேடிக்கை பார்த்துப் பழகிவிட்டால் நிமிர முடியாது.

'இளையதாக முள்மரம் கொல்க' என்பதை நினைவில் கொள் 

துணைக்கு யாரையும் தேடாதே.  அவனும் அப்படித்தான். 

உன்நலம் விரும்பிகள் உன்னைத் தடுப்பார்கள்.

அவர்களுக்குப் புரிய வைத்துவிட்டால் அநீதியைத் துரத்தலாம்.

ஊக்கம்

மனிதா! 

எதைத் தேடுகிறாய்?

யாரைத் தேடுகிறாய்?

அவசர உலகில்

அனாவசியமாக

நீ உனக்காக உருவாக்கித்

தூக்கிச் சுமக்கின்ற

கவலைகளை, வலிகளை, வேதனைகளை, துன்பதுயரங்களைத் 

தீர்த்துவைக்க தீர்க்கதரிசி வருவாரென்று தேடுகிறாயா?

இறைவனிடம் 

இறக்கி வைத்து விட்டு

இளைப்பாற எண்ணுகிறாயா?

அரசனோ ஆண்டவனோ 

உனக்குப் பணிவிடை செய்யவும் வேண்டுமோ?

ஊக்கம் கொண்டு

உழைத்தாலே 

உறுதுயர் அழியுமே!

உண்மையை உணராது 

பொய்யில் மயங்கித் திரியாதே!

தமக்கென முயலா 

பிறர்க்கென வாழுநர் உண்மையானே எனும்

பழந்தமிழர் வாழ்முறை அறிக 

கவலை விடுக 

ஊக்கம் உடைமை ஆக்கத்தில் முடியும்!!

உறவுகளின் வாழ்க்கை விடியும்!!!

எழுகதிர் விடியலை 

வரவேற்கத் தயாராயிரு.

உயிர்மெய்த் தத்துவம்

'அ'- உயிரெழுத்து

'க்' -மெய்யெழுத்து

அ-உயிர்வளி உள்ளிருந்து எழுவதால் பிறக்கும் எழுத்து-எனவே உயிர் எழுத்து எனப்படுகிறது.

க்-மெய் (உடம்பு) உதவியால் பிறக்கும் எழுத்து. எனவே மெய்யெழுத்து எனப்படுகிறது.

க்+அ=க-உயிர்மெய் எழுத்து. 

இது பிறக்கும் இடம் 'க்' என்ற மெய்யெழுத்தின் இடம்(மார்பு). அ பிறக்கும் இடமான கழுத்தில் பிறப்பதில்லை.

இதன் ஒலிப்பு முயற்சி,

'க்' பிறப்பதற்கான முயற்சியும்+ 'அ'பிறப்பதற்கான முயற்சியும் அடங்கும்.

இதன் வடிவம்,

'க்' மெய் எழுத்தின் வடிவத்தைப் (க) பெற்றிருக்கும்.(அதாவது நமது உடலில் உயிர் கலந்து இருந்தாலும், உயிர் கண்களுக்குத் தெரிவதில்லை. நமது உடல்தான் பிறரது கண்களுக்குத் தெரியும். அதுபோலதான் உயிர்மெய் எழுத்தின் வடிவம் மெய் எழுத்தின் வடிவத்தைப்

பெற்றிருக்கும்)

அ-ஒரு மாத்திரை

க்-அரை மாத்திரை

க-1+1/2=1.5 மாத்திரை வரவேண்டும். ஆனால் நீரில் சர்க்கரை கரைவது போல, உயிர்மெய் எழுத்து உயிரின் மாத்திரையைப் பெறுகிறது. அதாவது மெய்(உடம்பு எழுத்து) உயிரில் கரைகிறது. உயிர் நிலையானது. மெய் (உடம்பு) அழியக்கூடியது. 

தத்துவம்: நமது உடல் கண்ணுக்குத் தெரியும். நமது ஆத்மா அல்லது உயிர் கண்களுக்குத் தெரியாது. ஆனால் உடல் அழியும். உயிர் அல்லது ஆத்மாவுக்கு அழிவில்லை. இது தொல்காப்பியம் கூறும் மறைமுகமான செய்தி. 

அன்னையர் தினம்

When someone ask to me...

in my mind says...

Someone: what is your father?

Me: my father is ...  ...  ... 

(Actually acricultural coolly)

My father is Co-GOD.

Someone: what is your mother?

Me: My mother is the GOD

படிக்காத என் தாய் என்னை அதிகாரி ஆக்கி ஆசிரியர் ஆக்கி அழகு பார்த்தார். என்னை அப்படி இரு, இப்படி இரு என்று சொல்லி வளர்க்கவில்லை; என் முன் எப்படி வாழ வேண்டுமோ அப்படி வாழ்ந்து காட்டுகிறார்.

அன்னையர் தினத்தன்று வாழ்த்துவது வாழ்த்தல்ல.

அனுதினமும் அவரைப் பார்த்துக் கொள்வதே வாழ்த்து. 

பிரபஞ்சத்தில் நீ

சுயபுத்தியுள்ளவன்

சூரியனாவான்...

சொல்புத்தியுள்ளவன்

வளரும் தேயும் நிலவாவான்..!

புத்தியில்லாதவன்

விட்டில்பூச்சியாய்த்

தோன்றி மறைவான்..!

உழைப்பிற்கேற்ப வாழ்க்கை...!

ஊருக்கேற்ப பேர்!!

எண்ணம் செயல் சரியென்றால்...

எமனும் தூர ஓடிடுவான்.

பொருளற்ற சொல்லில்லை...

பொருளின்றி வாழ்வில்லை...-உன்

வாழ்வுக்கொரு பொருள் கொடு மனிதா!- நீயின்றி

இவ்வுலகு மிக இனிதா?!

ஆணுக்குப் பெண் இளைப்பில்லை

ஒரு கல்லூரிச் சுடிதார்

ஸ்கூட்டியில் 

தொண்ணூறில் பறந்ததா?

நூறில் பறந்ததா?

தெரியவில்லை...

ஒருவேளை நூற்றியெட்டாக இருக்கலாம்...

கடும் வேகம். 

காற்றைக் கிழித்து...

ஆணுக்குப் பெண் இளைப்பில்லை...

மரணத்தை நோக்கிய பயணத்திலும்!

மனக்கவலை

பேருந்துப் பயணத்தில்...

மடியில் இருக்கும் சுமையை

கவனமாக அருகில் இறக்கி வைக்கிறாய்...

பல நேரம் ஆளில்லா

இருக்கையில் வைக்கிறாய்...

மனக் கவலையை மட்டும்

இறக்கி வைக்காதது ஏன்?

நாய்

இன்று காலை 8.10 மணி அளவில் சாட்சியாபுரம் பெட்ரோல் பங்க் எதிரில் டாட்டா ஏசியை ஓட்டிவந்த நாய்,  விளையாடிக்கொண்டிருந்த நாய் மீது மோதிவிட்டது. நாயின் குடல் சரிந்து துடிப்பு நின்றது. அந்த நாயுடன் விளையாடிக் கொண்டிருந்த இரண்டு நாய்கள் செய்வதறியாது திகைத்து, குடல் சரிந்த நாயையும் டாட்டா ஏசியையும் மாறி மாறிப் பார்த்தவாறு லொள்...லொள்... என்று குரைத்தன.  அந்த "லொள்...லொள்..." குரைப்பின் பொருள் என்னவென்று எனக்குத் தெளிவாகவே புரிந்தது.

அடப்பாவி... நாங்கள் என்ன துரோகம் செய்தோம் உனக்கு?... ஏன் என் நண்பனைக் கொன்றாய்? இந்தப் பூமி நீ வாழ்வதற்கு மட்டுமா? இந்த நாய் ஜென்மம் உயிர் வாழக் கூடாதா? கடவுள் இந்தப் பூமியை உனக்காக மட்டும்தான் படைத்தாரா? காலங்காலமாய் நாங்கள் உங்களுக்கு நாயாய் இருந்து அடிமை வேலை செய்தோம் இல்லையா? இதற்கு நீங்கள் காட்டும் நன்றி இதுதானா? துக்கமும் அழுகையும் தொண்டையை அடைக்க அவை குரைத்தன.

இன்றைய சமுதாயம்

நாடு முழுவதும்

கொள்ளைக்காரர்கள்...

லஞ்சம் ஊழல் அதிகாரத் திமிர்

இல்லாத இடம் உண்டா?

சுயநலம் ஊர்தோறும்

பெருகிக் கிடக்கிறது...

ஒருத்தன் வயிற்றில் அடித்து இன்னொருவன் பிழைப்பு நடத்தும் காலத்தில் இருக்கிறோம்...

கொஞ்சம்நஞ்சம் இருந்த நல்லவர்களையும் அவமானப்படுத்தி அசிங்கப்படுத்தி கிண்டல் செய்து பொய்யும் ஏமாற்றுதலும் இருந்தால்தான் வாழவே முடியும் என்று கற்றுத் தந்து விட்டோம்.அவர்களில் ஓரிருவர் தவிர நாம் ஆசைப்பட்டதுபோல அயோக்கியர்களாகிவிட்டார்கள்...

'ஊரோடு ஒத்து வாழ்' என்பார்கள். 99 சதவீதம் பேர் பொய் புரட்டு வாழ்க்கை வாழும் போது இளைஞர் சமுதாயம் யாரைப் பின்பற்றும்? அவர்களும் வாழ வேண்டும் அல்லவா? 

முன்பு ஊருக்கு நாலுபேர் அயோக்கியன். இன்று ஊருக்கு நாலுபேர் தான் நல்லவன்.  

தாயைப் போல பிள்ளை. நூலைப் போல சேலை. சுரை விதைத்தால் சுரைதான் முளைக்கும். தினை விதைத்தால் தினைதான் முனைக்கும். இந்த சமுதாயம் வினை விதைத்திருக்கிறது. அந்த வினை இன்று முளைத்திருக்கிறது. இன்னும் ஆலமரமாய் விழுதுவிட்டு வளரும். வளருட்டும்.  

எந்தச் சினிமாவில் நல்லதைச் சொல்லியிருக்கிறார்கள்....

மாணவர்கள் அநாகரிகமான முறையில் நடந்து கொள்கிறார்கள் என்றால் அவனுடைய பெற்றோருக்கு எந்த சம்பந்தமும் இல்லை என்பதை எவ்வாறு ஏற்றுக்கொள்ள முடியும்? தாயைப் போல்தான் பிள்ளை.

கரியைத் தீட்டத் தீட்ட வைரமாகும்.

ஆசிரியர் சமுதாயத்தை வசைபாட வசைபாட நல்ல ஆசிரியர்களும் கையைக் கட்டி வாயைப் பொத்தி வேடிக்கை பார்ப்பார்கள்.  

அப்புறம் எப்படி எல்லோரும் எதிர்பார்க்கும் நல்ல சமுதாயம் உருவாகும்?

மருமகளை வசைபாட வசைபாட மாமியார் அரக்கியாகத் தெரிவாள்.

திட்டித் திட்டி மாணவனையோ, பெற்ற குழந்தையையோ திருத்த இயலாது. அரவணைத்து, நல்வழி காட்டி, ஊக்கப்படுத்தி, ஆர்வமூட்டி, தவறுகளைச் சுட்டிக்காட்டி, சிறுசிறு தண்டனை வழங்கிதான் திருத்த முடியும்.

நாடு நாசமாய்ப் போவதும் நன்மைக்கே! எது நடக்க வேண்டுமோ அது கண்டிப்பாக நடந்தே தீரும். 

குற்றவாளிகளே நீதிபதி ஆகிவிட்டால் இப்படிப்பட்ட சூழல்தான் இருக்கும். மாணவன் பள்ளி வகுப்பறையில் மது அருந்துகிறான். அவனைப் பெற்றவன் வீட்டில் மது அருந்துகிறான். "மாணவன் மீது தவறில்லை. பெற்றோர் மீதும் தவறில்லை. ஆசிரியர் மீதுதான் தவறு இருக்கிறது" என்று குற்றவாளியான பெற்றவன் நீதிபதிபோல் பிரச்சாரம் செய்கிறான்.

அமைதி

அமைதியான இடத்தில்

கடவுள் இருப்பார்...

அமைதியான உள்ளத்தில்

கடவுள் வசிப்பார்...

அமைதியாக இரு...

கடவுளைத் தொழு...

கடவுள் வருவார்...

மழை

வானம் வீதிக்கு வந்தது...

கோலம் அழிந்த 

இயற்கை ஓவியத்தை எழிலூட்ட...

மழையாய்..!

பச்சோந்தி

பச்சோந்தியை ரசித்தான்

பாமரன்...

பச்சோந்தியாகவே ஆனான்

படித்தவன்...!

படித்தவன் படித்தவன்தானே..!

ஒற்றுமையே பலம்

மாத நாட்காட்டிக்கு

மரணமில்லை...

அதன் ஒற்றுமையால்..!

தினசரி நாட்காட்டி

தினந்தோறும் கிழிபடும்...

தனித்து நிற்பதால்...!

நம்பிக்கை

வெள்ளைப் பூக்கள்

மணம் தரும்...

வண்ணப் பூக்கள்

நிறம் தரும்...

நிறமில்லை என்று 

வெள்ளைப் பூ

வாழ்வை வெறுப்பதில்லை...

மணமில்லை என்று

வண்ணப்பூ

வசைபாடுவதில்லை...

உன்னிடம் ஏதோ

ஒன்று உள்ளது...

நம்பிக்கை கொள்...

பூவாய்ப் பூக்கதான் பிறந்தாய்...

புன்னகையை ஏன் மறந்தாய்?

கருத்து சுதந்திரம்

கருத்து சுதந்திரம் என்பது

மற்றவர் கருத்தில்

தலையிடாமல் இருப்பது.

புன்னகை

மரணம் வாசலில்...

மலர்ந்த மல்லிகை...

பறிக்கும்போதும் பறித்தபின்னரும்

அதே புன்னகையில்..!

கடமை வீரர்

அடுத்த அலை வந்து 

அழித்துச் செல்லும்...

அறிந்தும் சிலர்

பாதச் சுவட்டைப்

பதித்துச் செல்கின்றனர்...

தவம்

கூட்டுப் புழுவின் தவம்

வண்ணச்சிறகிற்காக...

சிப்பியின் ரணம்

முத்திற்காக...

கரியின் செதுக்கல்

வைரத்திற்காக...

பொன்னின் உருகல்

சுடர் ஒளிக்காக...

உளியின் வலி

அழகு சிலைக்காக...

நீ மட்டும்

வலி பொறுக்காதது ஏன்???

வரவேற்பு

ஒவ்வொரு விடியலையும்

வரவேற்றுக் கொண்டாடிக் கழிக்கிறது-

கருங்குயில்!

முயற்சி

முயற்சியில் சிறந்த இனம்

மனிதனல்ல...மரம்!

பாறையிலும் ஆலின் ஆணிவேர்!

ஆறறிவு

ஆறறிவு உயிர்

மனிதனல்ல...மரம்!

இலையுதிர்க்காலம்

வலிமை

இருக்கும் ஒன்றைவிட

இல்லாத ஒன்றுக்கே

ஆற்றல் அதிகம்-

வெற்றிடம்

தியாகம்

உளி படாத கல் ...

சிலை ஆவதில்லை!

வலி பொறுக்காத சிப்பி ...

முத்தை ஈனுவதில்லை!

ஆழப் புதையாத கரி...

வைரமாவதில்லை!

வாழப் படியாத குழந்தை ...

நல்ல மனிதன் ஆவதில்லை! தெருவில் போவோரும் ...

தேரில் பவனி வரலாம் !

உருவில் சிதைந்தோரும் ...

ஊர் போற்ற வாழ்ந்திடலாம் !

விதியை வெல்லும் கல்வியே ...

அது நம் பள்ளியே !

கருத்தாய் படிப்போமே ...

கவலை மறப்போமே!!!

மாணவர் உறுதிமொழி

அரசுப் பள்ளி மாணவனாகிய நான்,

1) எனக்குக் கல்விப் போதிக்கும் ஆசிரியர்களை மதித்துப் போற்றுவேன்.

2) எனக்கு வயதில் மூத்தோரை மதித்து நடப்பேன்.

3) படிப்பில் முழுக்கவனம் செலுத்துவேன்

4) இப்பள்ளியில் பயிலும் மாணவர்கள் அனைவரும் என் உடன்பிறந்த சகோதர சகோதரிகள் ஆவார்கள்

5) யாருடைய மனமும் புண்படும்வகையில் தீய சொற்களைப் பேச மாட்டேன்

6) மது மற்றும் புகைப்பழக்கத்தில் ஈடுபட மாட்டேன் 

7) பள்ளிச் சொத்துக்களைச் சேதப்படுத்த மாட்டேன்.

8) ஒழுக்கமே எனது பண்பாடு. ஒழுக்கமே எனது உயிர். ஒருபோதும் ஒழுக்கம்தவறி நடக்க மாட்டேன் 

என்று உளமாற உறுதி கூறுகிறேன்.